2011年9月8日星期四

生豬肉

繼續跟進下滙豐裁減三千名員工既消息。
 
琴日我地計過裁員人數佔總數一成,原來匯豐刻意「報細數」,當中計埋恆生在內,如果單計匯豐自己,其實係七個員工入面、有一個已經要被裁!
 
何止,工會估計,當中有一半後勤員工會失業!
 
咁大事件,管理層選擇唔出來回應,最慘係兩隻招牌獅子Stephen 同 Stitt,成為左出氣工具,又要食「生豬肉」、又要見錢開眼,連打爛飯碗呢個死猫都要食埋,長為匯豐擁躉真係難過。
 
見唔見人其實都係公司選擇,不過作為本地最大僱主、以及擁有發鈔銀行獨特地位,匯豐有幾點係需要向員工、股東、以至客戶市民回應。
 
1. 點解匯豐要向成本收入比率只有43%既香港首先開刀? 如果計目標水平,其實香港早已達到歐智華定出既48-52%目標! 是否有人因想向管理層繳功入董事會,而刻意犧牲員工向老闆擦鞋?
 
2. 之前管理層兩次講過香港唔會大幅裁員,今次出爾反爾、似乎唔係簡單講兩句話自己會繼續請人、就可以胡混過去喎!
 
3. 客戶服務點樣保證? 過去匯豐都有幾次嚴重既系統故障,好似今年一月銀行服務癱瘓,五月又發生過網上銀行故障,幾次事故都係後勤服務有關。
 
有工會計過數,滙豐嘅後勤員工,大約有7千名,佔人手比例大約三成,按滙豐裁員三千嘅計劃,差唔多一半後勤會被裁走,到底點樣保證服務唔受影響?
 
而作為監管者既88樓,係咪又只係當「事不關己」就算數?

1 則留言:

匿名 說...

it's time to reflect on the one-sidedness love on HSBC from people of hong kong. honestly, outside of hong kong, many people regard HSBC as an england bank.