喪屍基金

歐洲繼續吊鹽水，美國又觀望議息，結果係，買賣兩閒!

市場係咪缺水？未必，睇新股反應就知。年尾幾隻巨無霸，公開認購普遍都夠數，少則幾倍，大則二百幾倍。

唔上市嘅，都只係嫌估值太平，唔想下限定價。斷估都唔係無水。

啲錢去咗邊？坐緊艇，可能係合理解釋。

唔理你係股神定沽神，今年嚟長渣股票，無乜邊隻唔駛輸。唔少基金今年嚟，跌咗兩、三成，要交數，唯有認輸離場應付贖回，呢類消息近期聽唔少。

持貨力強嘅，就可以再坐一會。調查話，原來有五成七投資者，啲錢買咗隻跑輸大市嘅基金，鎖死咗。唔係講緊普通嘅零售基金，而係入場費閒閒哋幾球美金嘅「股權私募基金」。

連專業投資者都要坐艇，其實大家都應該要睇開啲。

自己買賣，輸咗都無得怨，坐艇至少可以收吓息，慢慢捱。但呢班坐艇嘅超級大戶唔同，每年俾緊百分之２嘅管理費，賣點係往績好，跑贏大市。

今年？對唔住喇。收費高、無表現，呢類基金被歸類做「喪屍」基金，可能想笑班基金經理行屍走肉，無晒心機？

其實佢地更擔心點留住班客先真。市好，梗係容易達標，亦唔太介意分紅俾基金。但今年完全相反，無得賺之餘，唔少仲要倒蝕。時候一到，都係要揮手說再見，亦解釋到贖回潮點解咁洶湧。

睇準心理，原來早有部署。調查發現，呢班私募基金嘅客人，原來有八成都已經收到基金經理建議，叫佢哋將投資期，由原來一般嘅五年，延長多幾年，賣點係願景，亦即係明天會更好。

其實都幾難取捨。走，即係即時認輸，弊在街外又搵唔返更好投資，無仇報。

唔走，又驚傷口越踩越深，管理費硬蝕。所以，有錢又煩，無錢又煩，喺搵到新出路之前，似乎大戶仲係心甘命抵，俾班Fund佬呃。