2012年2月11日星期六

季節因素?

踏入2012,內地公布既經濟數據,一個差過一個。

內地通脹,同外貿數據,一個升得比預期多,一個放緩得比預期快。中外分析員,同我地一樣解唔通,唯有賴農曆年假季節性因素。

但今年一月係農曆年,一早就知,計算預測時預到架,點解誤差會咁大呢?

簡單講,就係計錯數。但唔緊要,齊齊計錯數,個個無輸無贏。分析界精彩之處係,解釋一個大家都估唔到既數,竟然得出一個截然不同既結論。

樂觀一派繼續話係季節性因素嘛!最牛既美林陸挺,仲唔知點解可以計出,撇除農年假,實際出口增長有近兩成九,入口升幅一成,比商務部部長數字,更加多!

但到底點計呢?佢只係話,扣除假期!!其實,季節性因素,經季節性調整,已經玩死唔少經濟學家,令太多重要數據出現估你唔到現象,美國就業數據就係經典例子!

掉返轉,如果係審慎派,就會捉住內地進口數字大跌,咬著唔放,話咁代表經濟活動,內部需求真係轉弱。

說真的、舊年夠有農曆年,進口都無跌。更重要係睇番一月主要資源進口,多數係跌。

鐵礦石為例,按年跌一成四,按月跌百分之七,鋼鐵產品按年跌四成三,按月都跌兩成二。

但樂觀派要撐,就指氧化鋁進口,一月份按月急升一倍半,按年亦增長到三成二??

睇埋油、一月平均每日進口五百五十一萬桶,較十二月多三十五萬桶一日。連銅進口量都升!
!
咁又點會難到悲觀派? 氧化鋁進口急升,只係同期岩岩好有多隻船抵達付運,海關入曬當係一月進口數字。

至於油,又可以歸咎油價回番,內地要儲油。

一月分,進口油數字,的確好難解釋,因為如果扣除假期,其實平均每日進口五百八十萬桶,破左舊年九月新高。

所以,一月份內地數字既好處,係任你解讀,是好是壞,任君選擇。

又好似通脹數據,明明高過預期,但分析界當然話農曆年因素之餘,部份更估年中會穿三,但年尾又會抽升。

其實,如果睇CPIPPI兩組數字,明眼人都睇到,內地有滯脹,同經濟活動放緩既風險並存。

更令人關注的是信貸市場。

一月貸款最初估有一萬億,之後話八千億。

到最後,一月份內地銀行新增貸款七千四百億都唔夠,廣義貨幣M2增長百分之12點4,係01年10月以來最低升幅,亦細過市場預期。

同之前盛傳,當局定出全年增長一成四既目標,有好大距離。

對於一月份新增貸款數字,分析員直指,失望,因為同舊年同期比,足足少近二千九百億人民幣。

相信係同當局多次要求嚴控貸款有關。

但唔排除,有望為減存款準備金鋪路。

更值得留意係,一月初,內地住戶存款急升,單月增加左一萬六千八百億人民幣,相反,同期嘅企業存款就因為年頭效應少左二萬三千幾億。

內地分析員指,居民存款急增,顯示銀行期內競爭存款激烈。

早喺一月,內地就指,銀行今年採取「以存定貸」策略,即係貸款規模,要視乎搵到幾多新增存款而定。

看來之前預言2012年最大風險是「西方不亮東方亮」,觀乎近日局勢,的確更令人不安。

沒有留言: