一世

上季成績好，Google以股代息回饋股東，但方法惹起極大爭議。

雖然坐擁４９０億美元現金，但董事局選擇唔派發現金，反而史無前例將股分「一拆二」，成立新類別「Ｃ股」，再以呢批無投票權嘅新股，以一送一嘅比例，派發俾股東。

重新出任行政總裁一年嘅創辦人之一佩奇解釋，已經諗左呢個做法超過一年，認為咁對公司同股東都最好，既可以保持企業管治架構，維持管理層專注長線發展嘅自由。

到底有甚麼自由令Page 覺得咁重要? 原來係例如令世界更加美好???

佢地認為咁做先可以避免受外界壓力，為短線利益放棄長遠機會。

佩奇又話，投資者買Google，本來就已經唔正常咁長期押注落，佢同另一個創辦人「布林」領導嘅團隊，而家只係要求押注更加長。

不過外界對呢個做法就好大保留。

分析員普遍相信，已經持有近五成八投票權嘅佩奇同布林，只係想保住操控公司嘅地位。

「金融時報」更批評，創辦人只係想一世都對Google有絕對控制權，係企業管治嘅嚴重倒退。

有啲發展策略其實都受人質疑，好似發展手機廣告業務，雖然幫助Google上季賺多六成，去到近２９億美元，收費點擊量更加上升近四成，比一年前增幅更幾近一倍。

但廣告商就每個點擊，畀Google嘅錢就跌左一成二，幅度大過舊年第四季。

有分析員擔心，Google仲要收購手機製造商「摩托羅拉」，進入毛利更加低、但唔熟行嘅硬件業務，擔心會影響盈利前景。