殺價大享

「電訊魔童」要做「傳媒大亨」，講過１００億先肯賣嘅電訊業務，而家半價成交。

為咗專注發展多媒體業務，城電以合共超過５０億，出售香港、加拿大等固網同長途電話服務，比私募基金「ＣＶＣ」。

電訊過去十幾年一直城市電訊核心業務，９２年由加拿大回流香港，王維基先以「殺價超人」形象，透過割喉式減價、打破壟斷嘅ＩＤＤ市場。

之後再投固網牌、由零開始、一手一腳喺全港舖設光纖網絡，令「香港寬頻」成為第二大寬頻服務供應商，客戶人數１２４萬。

今次放棄本業，王維基話，係電訊業務市場已經成熟、而且大部分業務只限喺香港進行。

相反發展多媒體業務，無論喺香港、內地同東南亞，增長前景都比較理想。

０８年入主亞視既十二日，自稱上左人生寶貴一課，仲燃起王維基對多媒體業務既興趣。

王維基係公認既電訊魔童，佢當年殺價超人，仍然令人津津樂道。分析員話，不能懷疑，魔童雖然在商言商，但對電訊市場有一定貢獻。

魔童當日，許下全港鋪網宣言，要覆蓋全港二百萬個家庭。用左三十五億，十一年時間，舊年剛好差唔多達標，一百八十萬家庭蓋幅，極速光纖寬頻，獲討論區極力推介。

今日電訊魔童要變身做電視魔童。五十億，同電訊業務分手。五十億，只係比當年三十幾億投資額多四成，但五十幾億，原來已經高過曬城電市值。

如果用市盈率計，交易相當於舊年市盈率十七倍，同行業睇齊，唔算係極靚價。

如果用五十億呢個現金額，同之前分析員認為城電既企業價值相若，即係今次魔童變身，其實令到城市電訊體現真正價值，係每股值七個一毫四。

賣曬公司唯一值錢，兼唯一有現金流業務。

城電俾現有股東既分手費，或者補償，係每股兩個半。魔童袋八億八千七百幾萬，小股東？

當然視乎佢地持股。但簡單一條算術，用交易總額相當於每股值七個一毫四計，即係股東分錢之餘，其實更重要係要夾番每股四個六毫四，幫王維基完成電視魔童美夢。

講到呢度，今次變身美夢，對魔童，同股東，代價係大過得益。瑞信之前計過，電視媒體業務，由於位短期一定係無盈利貢獻，預計每年會損害城電價值六億，相當於每股六毫子。

所以，兩個半呢個補償股息，只係夠現股東有四點一六六年做緩衝，抵銷電視業務燒錢。

憑魔童既創意，內容媒體行業，一定有番新現象，期待呢個發展之餘，亦證明一樣野，就係外資對有高現金流既項目，係情有獨鐘。

作為傳媒一分子，我反而關注魔童決定保留唔賣嘅、新聞製作單位，城電會以月費５５萬元，向買家提供新聞內容。

 新聞部一向係各台燒錢最旺的部門，以城電一年使費七百萬唔使、近百人員計，真係唔知條數點計? 難道是向員工殺價?