饑餓

細個老師有教，糧食係日常生活嘅必需品，意思即係經濟起跌，價格上落，大家只會食多、食少，但最終都係要食。

同樣道理，對麵粉廠嚟講，小麥價格連升５星期，一個禮拜貴咗一成，暫時唔入貨一、兩個星期都仲可以。拖得再耐，唔通真係執咗佢唔做？

所以當外電話，停止入貨一個月嘅印尼嘅麵粉廠，重新買料開工，仲要係大手大手咁買，大家知道需求始終有，小麥價錢好可能跌極有限。

越南亦有廠家話，為咗趕起批貨喺八、九月付運，仲要係小麥、玉米同大豆，全部掃貨，幾乎可以肯定，加價壓力好快轉嫁俾消費者。

罪魁禍首，大家歸咎係美國、遇上咗五十六年嚟最嚴重旱災。好快令人諗起，乜同０８年食物危機咁似？

同樣都係旱災，上一次影響澳洲，大幅推高白米價格，兩年內升咗兩倍。

漣漪效應，好似小麥同玉米，同期都貴咗一倍幾。唔好忘記，豬牛羊飼料都係食呢幾樣，教科書話，肉價一定跟住加。

今次一旱，大豆價格已經創新高，意味超越０８高位，大家會問，食物危機係咪重臨？答案係未必。

經濟師話唔駛驚，雖然亞洲有結構性通脹問題，不過，從來同呢幾種穀物價格無關。反而油價升、米價貴，先真正帶動食品通脹。

區內指標─你同我都有食嘅泰國米，雖然升到４個月新高，但同當年高峰期、每噸１千蚊美金比，仍然高出４成。

油價的確連升幾日，但同百五蚊一桶，相距仍然好遠。即係話，仲有排唔駛驚？

睇完供求，當然要睇埋資金面問題。０８年嚟頻頻印鈔，資金流入商品市場，投機性炒作因素，令食品價格遠離正常水平。

４年前撳掣，伯南克成功沖喜股市，但流資四流亂竄，發展中國家深受其害。４年後，市場繼續期待一撳再撳，喺建築自己嘅幸福之前，係咪應該先諗諗別人嘅痛苦先？