愛與恨

匯豐與渣打,交織一個愛與恨故事。
 
呢個唔係同行如敵國既關係,而係,一間爭扎五年,另一間威足十年。對投資者嚟講,感受固然不同。
 
十年盈利創記錄,渣打網頁官方訪問帶出市場最想知既疑問,點解渣打咁多年,市況越差,盈利表現越好?
 
有備而來既問題,冼博德語帶相關,講出成功之道,在於堅守價值及文化。
 
簡單幾個字,結論盡在不言中。
 
半年比拚,渣打匯豐香港擔當火車頭角色不變,本港業務同樣雙位數增長,證明,有無王冬勝,分別不大。
 
香港貸款需求,同人民幣業務,憑其亮點,幾乎每間本地銀行都受惠一二。
 
香港不能作準,如果大數比拼。匯豐半年稅前盈利增幅,無疑比渣打好。
 
但不能忽略,渣打撥備按年多四成一,匯豐只係增加百分之九。論核心指數,股本回報定輸贏,大象僅僅十點五,渣打升至百分之十三點八,仲話有信心達15%指標。
 
冼博德贏歐智華,仲有成本對收入比率低對方超過五個百分點。
 
匯豐,渣打香港總行,份屬鄰居,地址卻盡不相同。前者大道中一號,後者係德輔道中四號。鄰近之交,其實兩間銀行都走過相同既路。
 
渣打現有既光輝,冼博德強調係建基價值及文化。其實沒有九十年代初期既失敗,渣打未必珍惜既有價值文化。
 
從渣打總行講起,當年忍痛出售,正係見證渣打失敗既一頁。
 
渣打因為走出去,四出收購導致壞帳收場,更引嚟萊斯銀行食指大動,敵意收購,結果包玉剛,邱德拔出手拯救。
 
九十年代末,祁澤霖主席,銳意重新定位,零二年怒炒杜林,改由戴維思掛帥,就咁寫下光輝十年。
 
無獨有偶,匯豐亦賣過總部,更係總部之中既英國總部,因為走錯路,渣打要十年時間翻身,用時間計,匯豐要捱多五年。
 
但以臨危易帥計,歐智華上任年半,匯豐即係要頂多八年半。
 
銀行界稱,冼博德同歐智華都份屬大將,匯豐同渣打衰過,但有不假外求,自我翻生既本事,遠勝歐美銀行。
 
行錯路,更突顯文化及價值可貴。前花旗韋爾,澳盛邵銘高,不約不同否定銀行擴張模式,正正太多例子證明,太大,就太易出事。
 
渣打海嘯前後,兩度供股,一次批股,集資三次,股價反而創過新高,匯豐相反,一次「玩完」,各項指標仍然落後鄰居,渣打串得起。

成功之路,似乎大象要繼續減肥!!!將面容體重,回復浦大班年代!!! 

留言

此網誌的熱門文章

「急於求成」 JPEX 爆煲引證證監會監管不力

三十而立的金管局:思良將

減辣不單徒勞無功 甚至「好心做壞事」