2012年8月10日星期五

考驗




預言成真,一年前提出利豐會透過會計帳目谷大盈利,甚至同利豐管理層「隔空開火」。

瑞銀話,呢種「額外對價」既特殊收入陸續有來。

所以額外對價Earn-out,其實係指利豐對外收購新公司,由於一般採用分期付款方式,比左首期後餘款就放到應收帳內,留作未來要找數時先用。

由於餘額多數係同新收購公司業務表現掛勾,一旦新收購既公司業務表現唔理想,就意味著未來找數時要比既餘額會有所減少,結果吊詭係表現愈差,利豐反而透過呢種額外對價有「意外收入」。

瑞銀分析員梁裕昌一年前成為眾矢之的,今日就變身英雄,當日被利豐管理層同一眾行家嘲諷,今日頭上變成戴上光環!

梁裕昌的報告未有再為自己今日再錦上添花,只是再次批評利豐上半年透過呢個方式入帳近二億美元,正係反映新收購既業務係差過預期。

雖然利豐話下半年唔會再有呢種額外收入,但瑞銀相信以目前新收購既業務都係差過預期,估計未來幾年呢種谷大盈利既收入會繼續增加。

加上利豐既採購代理人模式受到考驗,佢維持沽售評級,並相信未來利豐有更大集資壓力。

信心盡失,正如瑞銀咁講,投資者對核心業務模式開始有疑問,更震驚係一年前管理層信誓旦旦話公平值已經充分反映,點知全部被瑞銀估中。

其實難聽點說,當日搬出會計師行報告,利豐只是賭一次新收購業務可以扭轉形勢,Buy Time 執靚條數,可惜事與願違,面對大形勢愈來愈差,利豐今次變成對投資者「講大話」。

管理層唯有繼續派定心丸,話下半年業務一定有改善。

不過市場唔會比時間利豐、投資者已經懲罰管理層,利豐大跌兩成,錄得92年上市以來最大單日跌幅,市值蒸發近260億。

事到如今,利豐所謂三年目標,已經相當遙遠,放棄只係時間問題。

可憐是投資者一心以為利豐採購代理人的角色仍有可為,只是當大企業面對不明朗都要收緊開支時,原來中間這點些微的利潤,都已經搾壓得一點不淨。

所以美國商場有俚語,說同Walmart 做生意根本就係「魔鬼之吻」,做與不做都沒有好下場!

沒有留言: