2012年8月11日星期六

滯脹來了


香港出名效率快,但統計處效率,卻離奇地低。

鄰近朋友第二季經濟先後現型,事隔近月,香江彈丸之地,第二季經濟表現終於揭曉。

按年增長百分之一點一,比首季好,但按季就倒退百分之零點一,一年嚟再次負增長,點解讚??!!
     
中環人話,經濟唔好,只係無預期咁唔好。

自滿無謂,香港次季增長尚算力保不守,全靠政府開支增長加快至百分之三點五,期內建築相關固定投資,亦維持到一成二增長。

如此一看,爵士曾當日十大基建,貢獻仍在。

無疑,全球不景,香江之地豈能獨善其身,遺憾係特區要走祖國基建帶動經濟之路。經濟師話,除非外圍突變,否則政府投資支撐,雖然半年合共增長只得百分之零點九,但修訂後全年目標一至二增長,唔算太進取。

新加坡第二季經濟收縮,台灣已經七度下調增長目標,因投資帶動,係咪代表香港好景,路人皆見。

出口?區內一齊衰,大家打個和。內需,香港是昨日之星了,觀乎第二季私人消費百分之三點七增長,零九年下半年以嚟最低,而同期訪港旅客人數增長仍然有一成半,簡單結論係,到港旅客,睇野多個買野!!

好笑係,中環某大美國品牌,趕走上海幫,豪裝進駐香江,用既八個月時間,經歷零售大牛市,到現在擬似零售熊市,難道好似新股市場一樣,巨無霸上市之日,就係跌市之時?


三個月前,我地率先提到,經濟增長放緩,惟通脹未有同步回落,實屬危險。今日,政府下調增長目標上限一個百分點,通脹預測就上調零點三個百分點,基本通脹全年估百分之四點三。

好明顯,政府每月文稿堅持,通脹回落係假!

滯脹形成,政府仍然可以借滯後租金回落,口是心非一番,但近期樓價升溫不斷,誰敢說通脹已經見頂?

更不幸係政府講述經濟既符錄圖表第十四頁顯示,薪金增長趨勢繼續回落,整體工資指數回落到舊年上半年水平,而低收入階層薪金跌幅,係明顯最多。

既滯脹,薪金增長亦放緩,一個字,「慘」。刻下之勢,偉大政府為保民望,河蟹大前題,更多派糖自然可期

無疑,回歸十五年,香港最大成就係儲備多,簡單一算,財政儲備六千多億計,七百萬港人均分,每人八萬五左右,有呢個八萬五,一定舉腳讚成!!
!
斷估,新政府總部再無人會認承師郭伯偉,夏鼎基。既然沒有包袍,經濟向下,滯脹形成,香江特區會否步入福利主義之路,敬請留意!!!

沒有留言: