2012年8月14日星期二

否極泰來?



認為歐債危機會令歐元已死?

未等到歐元解體,沽空盤可能率先被挾倉離場。

六月專捕捉宏觀趨勢既對沖基金Macro Fund,減持歐洲股票空倉既比例係三年來最多。

同樣,芝加哥商品交易所資料顯示,歐元短倉既合約大幅減少。

更令人意想不到係、法國債價表現。

奧朗德上台前,因為擔心南歐國家可能拖累法國既銀行體系,十年期法國債息一直喺三厘樓上,同德國債息差距更創下189個點子既紀錄差距。

不過由今年開始,法國既債價就一直急升,累積跌左105點子,回落到兩厘左右水平,同德國差距收窄到68點。

或者最新法國經濟數據亦可以解釋。上季當地經濟係「零」增長,市場原本估會收縮百分之零點1,換言之法國係避過左經濟衰退。而對上兩季,經修訂之後,亦都係「零」增長。

德國第二季經濟增長經季節性調整後、按季升百分之零點三,亦好過預期既百分之零點二,主要係出口改善,消費抵銷到投資疲弱既影響。

一個月前仲唱淡歐洲股市既「末日博士」麥嘉華話,相比起中資股,認為而家當地股市更買得過,原因係估值合理。

佢仲要話自己係獻出「成世人」第一次,買歐洲股分,話末來仲會買入更多。

不過要一面倒睇好歐洲似乎又言之過早,九月分仍然有好多變數,包括月初歐央行行長德拉吉,係咪真正可以做到「言行一致」去救市,而月中德國憲法法院係咪會否決成立ESM,亦可能構成新既震盪。

而法國就算避得開衰退,以CDS違約交易掉期總額仍然達到237億美元,仍然係單一國家最大規模。

金融時報既社論更家話,以為歐洲資產價格回升、經濟復蘇就會返嚟呢種想法,完全係不理性。

只是市場要搵升市借口,淡友八月咪先收儉下,九月先再戰江湖!

沒有留言: