2012年8月3日星期五

驗金

洛杉磯時報一篇報道,美國財政部正進行一次史無前例行動!!
 
極有機會引起黃金戰士興趣既洛杉磯時報近日一篇報道,透露原來財政部一月份開始,派員進駐紐約聯邦儲備銀行總部大樓,當然唔係查數,亦唔係將行長杜德里雙規,而係驗金。
 
眾所周知,美國係全球最多黃金儲備既國家,秘密金庫集中四個地點,包括最著名既Fort Knox。
 
至於紐約,二次世界大戰期間,大量國家黃金儲備因為安全起見,存放紐約聯儲銀行八十呎既地庫入面。
 
有看過Die-Hard 3,就應記得布斯韋利士在紐約搶回被恐怖分子取走的黃金,正是模擬紐約聯儲銀行金庫。
 
到依家,仍然有大約市值二百一十億美元黃金儲備喺紐約聯儲銀行既地底金庫。
 
根據報道,今次由財政部牽頭成立既驗金大隊,為數最少十二人,分別嚟自財政部既核查部門、鑄幣局代表,同埋政府審計機關。
驗金大隊成員抵達金庫之後,第一時間係從紐約聯儲銀行金庫合共五十三萬條金條中,抽樣檢查最少三百五十條金條。
 
話明驗金,除左證明黃金仍在之外,更重要係檢查黃金是真是假。
 
點樣驗呢?原來好簡單,就係由檢金大隊,從每條經抽樣既金條中,各自鑽取樣本,從而判斷純金度。
 
咪睇少驗金既成本,除左人力物力外,今次紐約聯儲銀行進行既驗金行動,鑽取樣本就最少價值十一萬美金。
 
當局唔肯講點解忽發奇想驗金,詳情亦拒絕透露,但檢查結果年底會正式公布。
 
比起黃金戰士,行將退休既眾議員Ron Paul一定對驗金大行動相當關注。事關老保羅早於三十年前,已經就美國黃金儲備問題窮追猛打。

對於當局遲來的行動,保羅議員不悄咁話,自己人查自己人,有咩意思?夠膽就公開俾人驗。
 
仲話,佢從來無懷疑美國黃金儲備已經偷龍轉鳳,相反佢只係好懷疑批金,有無被利用進行不法活動。
 
投資界一向充斥陰謀論,行內一直有一個公開傳聞,就係美國堂堂黃金儲備大國,其實金一早無曬!!當日IMF前總裁卡恩突被酒店陷害,傳聞正係因為對黃金數目存疑。
 
到依家,財政部高調驗金,陰謀論派,又有新既陰謀論!!
 
的確,太多事情有巧合。聯儲局寬鬆了結無期,最快九月又會有新宣布。全球印鈔既同時,美國赤字懸崖,到年底又會成為全球聚焦。
 
如果將所有事情扯埋一齊,現鈔繼續唔值錢,黃金自然價更高,由於財政部寄存聯儲局既黃金,幾十年嚟一直以三十三美元一安士記帳,將批金儲備確認價值,再按現時市值重新入帳,咁美國財赤就少好多。
 
更重要,咁多金喺手,美國廢除金本位近半個世紀後,又有能力再嚟一次。總之世界大亂,花旗大國趁亂世未有自亂陣腳,反而頻頻部署,難怪惹人猜疑!!

沒有留言: