血洗渣打


渣打被譽為全球金融股既另類,有賣點,有概念,夠穩健,美國一份廿七頁紙既報告,一夜間就摧毀左股份市值千億,世事的確難料。
 
有渣打頭十五大投資者直指,美國紐約當局指控渣打嚴重,由希望變為失望,係擔心一間銀行信譽受影響,影響所及唯有暫時割愛。
 
簡單講,花旗大國報告形同劊子手,渣打有大戶沽貨離場,係千真萬確既事。
 
除左股價,渣打相關債券,溢價初段亦擴闊最少廿點子,信譽受損,九十年代發生既事,又再令人歷歷在目。
 
英國獨立報形容,事件諷刺,一,最無可能既事發生,渣打黑天鵝出現左; 
 
亦令人遺憾係,冼博德被英國認同為最具能力既新晉銀行家,未來英倫銀行行長人選,而佢,更係多次提到,監管重要。
 
誰要負責,係市場必然問既問題。尤其係,零六年負責北美業務高層善意提示,係邊位粗口回應?
 
如果翻番記錄,零六年之前,負責北美,英國,中東等業務既董事級數高層,只有一人,就係現任財務董事麥定思。
 
而麥定思亦同時負責風險,法律,以及內部監控。到零六年十一月升職後,先將風險管理一職,交俾當時執行董事藍凱英負責。
 
從此推斷,麥定思似乎責無旁貸。但外電引述多名分析員以受企業管治專家提醒,二千五百億美金違規交易,比渣打市值大以數倍,事關重大,嚴重性屬於紅色級別,要問責,係整個董事會,同涉及高層通通有份。
 
如果咁,前主席祈澤霖,桑德森,戴維思,甚至多名負責制衡高層既非執董,包括現任英國金融服務局主席,以至港交所主席周松崗,都有問題,事關兩人都擔任過渣打非執董。
 
血洗渣打,原因係睇唔通,公平的講,一隻股份街貨流通唔多,放大效應會比其他股份大。
 
值得留意,幾乎同一時間被美國當局指控,匯豐行政總裁歐智華幾乎即時認錯,但渣打冼博德就企硬還擊。
 
渣打選擇企硬,有佢地既原因,指控金額太大,實在擔當唔起,試問,如果按一成金額既罰款慣例,即係二百五十億美金,相當於過去8年盈利總和,同時渣打一級資本,即時跌剩百三億美金,比率由全球最高,變為全球最低之一。
 
作為全球第7大美元結算銀行,大行擔心渣打失去紐約牌照,會對業務有影響,瑞信形容指控令人震驚,威脅要吊銷牌照既做法更係史無前例。
 
新興市場賣點,發夢估唔到,衰俾美國。美國對渣打微不足道,但渣打美元結算系統全球排名第七,要釘牌,渣打批發銀行唔使做。
 
渣打因為今次美國指控,單日市值無左近七百億,其實坊間都開始有疑問,到底點解渣打可以做到2500 億美元既伊朗生意???
 
FT 評論版都幫返同鄉,話單睇NYDFS聲明,其實更似一分政客選舉演辭多過調查報告,陰謀論之說溢於言表。
 
無論如何,今次渣打肯定難收尾,事件除左美國係贏家外,應該仲有一群律師..............

留言

此網誌的熱門文章

「急於求成」 JPEX 爆煲引證證監會監管不力

三十而立的金管局:思良將

減辣不單徒勞無功 甚至「好心做壞事」