2012年8月6日星期一

乒乓經濟學

四年一度,倫敦奧運期間,全城關注。單車、游水、田徑、排球,場場精采。唯獨是其中一項,乒乓球,別具意義。
 
兩個層面。政治上,70年代乒乓外交,美國隊員上錯中國隊員旅遊巴,引伸一連串外交突破,中美關係隨之破冰,尼克遜首次訪華,傳頌千古。
 
仲有。貴為乒乓球發源地,倫敦市長約翰遜早喺4年前、京奧閉幕式上揚言,要將乒乓球帶返英國。無錯,當初貴族飯後消遣,飯枱做枱、雪茄盒當波板,到今日登上國際頂級體育盛會,名符其實係重返老家。
 
不過,學無前後、達者為先。國家乒乓隊唔止球技過人,連產品技術都進佔世界前列。睇賽事直播,官方指定產品供應,波枱、球網,全部有「紅雙喜」標誌。
 
品質好,海外球員齊齊讚。有非洲球員試過,話「紅雙喜」波枱反彈力理想,表現平均,個波嘅走勢容易預測,唔會估佢向左、佢走右嘅情況。有口碑,自然可以賣得貴,一張專業用波枱,承惠萬五蚊美金。
 
成12萬港紙,背後科研投入,其實更多。目標出年成為全球最大,「紅雙喜」喺乒乓、羽毛球等項目,投資近千萬人民幣做技術研發。國家乒乓隊表現好,08京奧又撥出120萬獎金。
 
由零做起,穩打穩紥,其他體育用品股要追,唯有一擲千金。注碼最高嘅可能係安踏。贊助國家隊領獎服,市場估計贊助費高達6億人民幣,仲要攤分4年入帳。
 
細碼啲可以逐個項目贊助。李寧專注國家隊,跳水、羽毛球等5項,形成裏面李寧、外套安踏嘅和諧局面。
 
例子仲有361度,睇中泳隊新星孫楊,同時偏向冷門贊助北韓;匹克仲誇張,搶唔到國家隊,選擇漁翁撒網,贊助7支國家隊,媲美NIKE同ADIDAS等國際品牌。
 
駛咁多錢,行業分析員都話,廣告佔銷售額比重,會升1至2個百分點。
 
可惜,贊助根本無辦法刺激銷情。又啱,諗深一層,除咗奧運之外,有幾可見同一場合、咁多人一齊著安踏、李寧?
 
呢個觀察,唔止大中華觀眾睇得出,就連遠喺海外嘅紐約時報都係咁講。既然無法超越,不如先下手為強,買起佢。講緊有遠見嘅「李寧」先生,早喺07年就低價出手收購「紅雙喜」、呢個真正民族品牌。
 
講到底,品牌形象唔係單用錢、可以堆砌起嚟,生意已經惡劣,仲要大開水喉,仲要幫唔到業績。為乜又?

沒有留言: