2012年9月14日星期五

九一四


還記得四年前的今天914?

毫無疑問,2012年9月14日,可能區內為主新興市場央行最痛苦既一日。

伯南克嘅QE3期票、今次唔淨止兌現,仲要無人估到,佢會簽一張、未填數字嘅支票!

完全殺市場一個措手不及!!

先係歐央行、依家連聯儲局都跟住無限期、兼無限量印錢! 金融市場即進入亢奮狀態!

但對於新興市場嚟講,依家就即時要搵辦法、防止歐美大量熱錢湧入、造成嘅通脹同資產泡沫!

所以金管局總裁陳德霖、喺朝早回應左聯儲局政策後,下晝就隨即宣布,為防範銀行體系風險,收緊第二套房按揭,包括降低供款入息比率。

論反應速度、金管局今次係贏左!

但講到實際作用,如果真係要打擊投機炒賣,要收緊按揭成數先至係最有效!

但宜家只係由買家嘅負擔能力入手,直證明到自住同樓換樓仲可以獲豁免!

現在買第二個物業及以上嘅按揭申請,佔成交大約係三成半至四成,不可謂不低!

相反,金管局話佢地留意到大約有百分之五既貸款人,刻意延長按揭年期、甚至做到四十年,由於咁會增加銀行風險,所以即日起限制新造按揭年期,唔可以超過三十年。

以原本買3百萬樓、供40年,每個月供款6千5百幾蚊。

但收緊到30年每個月就要用近8千蚊供樓,俾多千4蚊,除左增加供樓負擔,亦會直接影響買家、去做按揭時既供樓入息水平。

結果是影響埋首次置業買家。

或者多得伯南克,沒有他,陳德霖唔會八小時內兩度現身,先預警,再出招。

所謂招,有用與否,意義不大,正如卓伯德所講,要買,咪俾人買!!

人人話,金記出手因為思歪,實際係思歪供地至上,金記事宜一直不管不問,中環人話,八十八層高火速出招,係行動話俾大家知,大事不妙也!!

確實、經濟向下,貨幣政策本應屬於寬鬆性。

但因為驚伯南克呢個人,南韓,菲律賓,泰國,印度,甚至內地應該減息都唔敢減息。

而俄羅斯更提前預防,出乎意外加息四分一厘,指標利率加到八厘二五,係九個月以來首次加息。

經濟師話,俄羅斯決定唔係個別例子,而係突顯美國無限量印鈔,令其他央行政策進退失據。

確實,歐美兩個央行行長不約而同將貨幣政策轉為無限寬鬆,令其他經濟體系面臨重大決擇:

到底係再掀「貨幣戰爭」、落閘禁止熱錢流入。

定係跟隨「大隊」,無視通脹風險先加馬寬鬆救經濟?

顯然美國政策撤底影響新興市場,區內央行一日之內,由防衰退,一百八十度改為防通脹。

至於備受關注中國,中外經濟師提出,同前兩輪QE比較,目前中國經濟好大機會處於滯脹格局,「滯」難以化解,「脹」就擔心跟隨國際大宗商品價格走勢見底回升,限制左再推寬鬆貨幣政策好似係減息既空間,巴克來更形容,周小川已經面對前無未有兩難局面。

沒有留言: