2012年9月6日星期四

殺手鐧?



揀咗兩幅喺啟德新發展區嘅地皮做首批港人港地,涉及1千1百幾個單位,限制年期比之傳既3年長好多,去到30年!

兩幅地原本放咗喺勾地表,出年一月至俾人申請勾地,而家改咗做港人港地,有測量師就將估值調低兩成,預計只係賣到4800蚊呎。

而日後落成連同建築費,估計就要賣萬一蚊左右,同而家市價差唔多!

「英十招」出手啱啱一個星期,而家咁快又作補充,證明只有一件事,就係力度不足!

口痕友話,思歪一講完「港人港地」一千一百個單位,就突然落起傾盆大雨,似乎天公都要話比佢聽,「唔收貨」!!!

咁我地問過施老闆,佢講明、唔會用「失望」呢類字類形容,不過都覺得有啲地方可以再做好啲,例如可以限制唔比出租甚至係只賣比首次置業人士,而家計劃細節就太簡單,幫唔到真正需要買樓嘅人。

客觀啲講,呢個星期出招後成交方面確係睇到顯注回落,不過業主似乎都係仍然強勢,叫價繼續進取,所以價錢完全無回落跡象!

成日話到底樓市有無泡沬,其實泡沬永遠都係爆破之後先會察覺!但一啲樓市唔健康既現象,就仍然係可以喺數據之中搵到。

以啱啱公布既八月樓市成交數字,一百萬至二百萬既成交宗數,只有808宗,佔整體比例,由同期一成九大跌至一成水平,創左近年新低,似乎都反映,二百萬樓下成交絕跡,係有數據支持。

再睇到多兩個數據,八月既居屋同公屋成交,喺政府話會推出五千名額免補地後,都吸引大量買家「恐慌性」買入,公屋交投八月分有35宗,急升左16%,有三宗更超過二百萬。

而居屋就更誇張,全個月成交有645宗,升幅有四成半,創左三個月新高,神加既係、三百萬以上成交多左七成半,呢個價錢肯定追得上私樓!

實際數據反映,呢兩個月既樓市升浪,同過去幾次升市唔同、係由中小型單位帶動,由於直接影響到民生、亦都成為左思歪最頭痛問題!

咁港人港地似乎係對症下藥,至少可以做成心理預期,唔需要搶高地價!

但最叫費解係上星期先話港人港地涉及法律修訂,唔通我地新上任既袁司長,唔聲唔聲先至係政府最有效率既部門?

花旗今日都出左報告幫思歪把脈,直言相信英十招唔會收效,相信政府好快會出新招,而且焦點會由增供應、變成壓需求,務求盡快收到效用,可以向阿爺交到功課!

當然最效方法係由金記入手,直接降低LTV、即係按揭成數。

雖然舊年四月金管局名義上已經將投資物業成數降至五成,不過有買樓都知,其實買家只要向銀行DECLARE  係自用,銀行仍然可以借足七成,銀行亦都難以核實。

不過花旗隨著正面信貸資料庫推行,金管局可以一刀切,將第二套房按揭成數減低、甚至拒做,肯定可以減低投資需求。

但呢招真係要當局有好大決心,一個星期思歪先當著一總傳媒高層,提出投資需求係咪要壓抑,似乎言下之意係有所保留!

有人當面過金 記88樓攞命.陳,點解唔效法阿爺、索性行政手段指令銀行禁第三、甚至第二套房按揭,因為以銀行控制風險名義提出,大有道理!

點知攞命反應出乎意外大,話點可以咁絕,言下之意,係諗都無諗過!

沒有留言: