2012年9月13日星期四

獨賣之謎?



教主臨終前遺作,iPhone 5終於見人,但由於洩漏太多,最終變成驚喜欠奉,功能、外觀毫無新意。

屏幕長咗、機身薄咗,升級4G,睇嚟好似好大變革。

但撇除果粉以外,一眾智能手機用家會話,今次充其量只係追貼三星產品技術,真正突破喺邊?

不禁令人懷疑,蘋果中人係咪驚後勁不繼、仲有殺手鐧未出?難怪有評論話,手機設計已經好成熟,每一代都要再推陳出新,其實唔易。

你會問,咁換機定唔換機好?似乎作為一般用家,吸引力的確唔大。真正用家似乎可以觀望吓,等到新機出貨,有人玩過試過、睇埋讀後感先決定,都未遲。

但睇完蘋果發布會,分析都即刻上調今個月嘅銷量預測,究竟點解?

因為有炒作因素。星期五預售,下星期出貨,沉寂一時嘅iPhone炒家,又再蠢蠢欲動。iPhone資訊網站重新啟動,炒家又率先教路,先喺網絡商登記、再喺蘋果專門店排隊,十月過後又再上網買多次,粗略估計,前前後後十部經手,難度唔算高。

其實最緊要係首批無強國,而家就睇埋同胞們肯俾幾多。

率先有內地網站,開價7千人民幣代購,仲有叫價截圖為証。

扣返匯水同收貨折讓,平均每部仲有2千蚊落袋。難怪有資深炒家推算,如無意外,今次炒iPhone要有5位數字落袋,無難度。

但前提係收機舖,係咪見貨即收?點都要提返句風險警示。「炒賣有風險,價格可升可跌」。

最佳例子就係上一代4S。叫價托唔起,損手嘅唔止普羅炒家,半年前仲搞到實力雄厚嘅「收機舖」周轉不靈要執笠。

係咪要炒埋一分?暫時都唔建議。但要強調呢個、一年一度嘅蘋果炒賣大會,可觀性十足。

諗起網站攻陷晒,蘋果店門口又雲集各路人馬,瞓街瞓足一星期。相比起投資市場,股市無方向,樓市一味升,齋睇,都已經值回票價。

況且,蘋果產品,必受追捧。就算山窮水盡,大不了來一部蘋果懷舊版2G,亦肯定不乏買家。

主流財經傳媒話今次係蘋果創辦人喬布斯逝世一年來、蘋果推出最重要既產品,但設計上似乎只掛著繼承喬布斯既承傳,未有太大創新。

無計,你點彈,你點挑剔,佢係蘋果! 而家預計今個月就可以賣到一千萬至一千二百萬部,破盡蘋果以至所有電子產品紀錄。

難怪庫克可以夠膽講: 「蘋果從未如此像今天強大」!

今次較耐人尋至於iPhone 5既Presentation 上,點解會獨家點名數碼通?

按照iPhone 5制式,佢地支援係 850/ 1800/ 2100HMz,正正係數碼通而家既頻譜。

可以補充一下,其他三個網絡商唔係無iPhone 賣,只係佢地既LTE制式行 2600 HMz,未必即刻可以支援到iPhone 5 既4G。

不過跟據佢地既計劃,都會陸續UPGRADE本身既4G網絡,其中三香港就話,比三個月時間佢地,就可以將現有既1800 HMz提升!

問題係、邊個會等三個月? 明日開始可以到網絡商登記,你會揀邊個?

反而令人奇怪係、數碼通最初無投資到主流既2600HMz,而家反而比佢配合到蘋果,到底係純綷運氣? 定係事先有協議? 真係耐人尋味

沒有留言: