同枱CEO

每股由過百蚊，跌到得番幾蚊，仍然對思捷關心既人，不外乎佢仲係股東，又或者要睇下思捷呢班每年數千萬人工既高層，到底有咩法寶可以力挽狂瀾。

作為藍籌，思捷管理層近年就等同奧巴馬上身，CHANGE!!

對方靠印鈔，而思捷業績就靠回撥。

全年經營溢利十一億幾，不能忽略係上半年已經有七億八，即係下半年唔夠四億，仲要入面有六億九係回撥，即係話，一旦無回撥，下半年經營虧損有三億幾，差過預期。

思捷下半年無論盈利大數，同營業額都未得，思捷還可以賴關閉分店，還可以用回撥充斥。

嚟緊點，思捷繼續發揮一招，只管信不要問。

但有進步既係，柯大俠始終有一手，下令全公司高層，兼所有董事列席見媒體同分析員，背後兩大意義明顯。一，思捷仲係一間陣容鼎盛既公司，二，係我柯清輝做到既野，之前高漢思都唔得。

更有趣係，思捷業績，大部份時間由已於今日卸任既范德施解晝。

一方面當然顯示佢為人有交帶，但法例上，佢唔再係思捷人，因為思捷已經公佈范德施離任，由外人身份講解業績，說服力無問題，話曬份業績係佢親手湊大。

但范德施始終欠股東一樣野，就係到今日，佢都無穿上一條真正思捷出品既牛仔褲出嚟，事關牛仔布產品，正係佢上任當日話既主打。

新任主帥馬浩思眼仔精靈，係咪可以寄以厚望，時間會證明。

馬浩思頭炮話，要內地，孟加拉、印尼、印度直接採購服裝，以節省成本，其志可嘉。

問題係採購既野，講求網絡，思捷正係之前無集中自行採購既經驗，似乎馬浩思真係要發揮在Inditex 的物流高手本色。

更大問題係市場比較少留意既現金，舊年佢地淨現金由廿七億幾，降至十四億八，未來怎樣應付轉型既一百八十五億預算計劃呢？

令人擔心係，舊年思捷廣告相關開支十五億，已經係全年盈利近一倍，簡單計，今年再有同等廣告開支，甚至搵多幾個男女名模，思捷咪會負現金流？？

毫無疑問，思捷未去到一文不值既地步。但既係上市公司，又係時裝品牌，困難比任何企業來得嚴重。

因為股東要盈利，但客戶要品牌質素。思捷要改革，要改LOOK，就要先將之前既產品一筆勾消，而用大量現金不斷償試，但期間幾乎無盈利增長可言，從思捷例子，股東同產品支持者矛盾盡顯。

思捷目前既企業對銷售值，係零點五倍，全球上市品牌最低。比H&M三倍係搖不可及，比有利可圖品牌平均一至二倍，亦不及格，撇除股價，思捷既估值告之，市場預期佢地係繼續虧損。

又或者由好處著想，思捷今日匯報，佢地新Line 產品由草圖設計到上架，已經可以收窄到8至12個星期，算係向Fast Fashion 邁向一步。

但同Inditex既 ZARA比較，人家每間分店只係有三日存貨，新設計既產品只係需要十五日就可以上架，一個星期賣唔出就會收埋唔賣，似乎思捷仍要努力。