One Old Man
時間同事件，每每改變人對人既睇法，魯賓，薩默斯，格老，曾經何時被冠以為拯救地球三戰士。
奈何，三人今日卻由天堂墮入凡間，三人功過未輪到我地定論，但外界對佢地睇法既逆轉，亦係證明原來好多所謂既共識，根本未經教驗就去結論。
世態炎涼，以全球今時今日既環境，以美國貨幣量化步入危險狀態，主流媒體只會重複搵格羅斯，麥嘉華做訪問，而唔會再想起格老，更忘記左有沃爾克呢個人。
先後為５任美國總統，服務超過５０年，做過十年聯儲局主席嘅沃爾克，慨歎時不我予﹗
佢喺蘇格蘭演講時話，如果後生５年，就可以更加好咁幫手整頓充斥銀行家同政客貪婪嘅世界，亦可以繼續推動「未完成」嘅金融改革。
可惜而家已經８５歲，覺得有心無力，形容而家可能係有史以嚟最困難嘅時刻，國會、政治、意態形態分野，根本就咩野都唔可能有共識，成個政治系統都令佢失望。
講到金融改革，一手鼓吹加強金融業監管Volcker Rules 既沃爾克就有啲「火滾」，話三十年嚟，金融創新唯一最有用嘅，就只有發明左自動櫃員機。
又批評唔畀銀行投機炒賣，世界就會冧嘅講法完全係廢話，仲直指華爾街大行唔鍾意嘅話，大可以唔好要銀行牌，轉做對沖基金就無皇管。
格老無疑係近半世紀最具知名度既央行行長，惟論影響力，沃爾克當之無愧。
佢瓦解金本位，拯救全球匯率危機，處理超級通脹，更重要係唔向華爾街賣脹，唔為白宮賣政治人情。
結果，局內幾乎叛變，八三年幾乎被炒，八六年幾乎劈炮，到八七年終於捱唔著交位置予格林斯潘。
沃爾克在每日電訊報既訪問，反覆細看，總有酸溜溜之感。無錯，八十五歲了，但佢既無借題發揮為自己平反、趁日子無多要贏得生前生後名，更無乘機抽水或者指三道四，反過來只係嘆時不與我，一句吾老矣，有心無力，意簡言賅，背後甘苦盡在不言中。
沃爾完係咪萬能？係咪真英雄？
如果英雄定義係寂莫，佢尚且稱得上真英雄。呢位八十五歲老人，可愛之處唔係夠高，唔係當年夠膽大幅加息，而係咁多年嚟，從來唔無利用自己既CV搵大錢，正當格老退任後跑去當德銀同PIMCO顧問，演講收費每場數十萬美金，沃爾克依然係當日既沃爾克。
以佢名望，總可以華爾街撈一分油水；以佢經歷，可以吊起嚟賣。
但對不起，多次擔當檢討顧問，佢收費只係象徵式一美金。
更感人係，幾十年前因為當官收入大減，佢太太決定兼職，住所決定要分租，自己亦改食價錢平、味道差一些既雪梨，居然換來是「臭男人」既綽號。
所以，沃爾克五十年嚟，撇開功績不談，但已經示範咩叫做清官，來時一無所有，去時兩袖清風。
華爾街大鱷對佢恨之入骨，並唔係佢要加強監管，而係由後生，到老，佢堅拒融入呢個圈子，呢個亦代表著佢同格老聲譽上永世既分別。
Ｗilliam Solber四百幾頁既新書，就以堅持的勝利「The Triumph of Persistence」為題，書列入了FT 今年最佳商業書藉，書入面一句「More Than a Central Banker」，已經是老人一生最佳寫照，絕對值得一看!!!
留言