2012年11月2日星期五

異常流動.....研究組


由話少規模,到加快,繼而近日高速,兩星期嚟,外界對熱錢流入既形容不斷升級。

因為,陳德霖真係每日接錢,又的確,曾俊華話資金流入有限,實際同現實並不符合。

暫時為止,銀行體系結餘恢復增長,即係陳德霖復出接錢以嚟,睇到流入既錢有三百多億。

但睇唔到既錢,無人知?

按照大摩用埋銀行淨外匯資產變動呢個數,單係八,同九月,其實流入既已經係有七百七十億港元,當時結餘都未郁!!!

QE3,流入既錢,係咪好似政府所講,少過QE1?答案係。由於QE3不設限期,QE1就係08年底到一零年三月初,所以我地用同一基數,由今年九月十三日宣布QE3到依家涉及既五十二日作為基準,比番上次QE1之後既五十二日。

結果發現,宣布QE1之後頭五十二日,經銀行結餘流入既錢,有七百九十一億七千六百萬港元,相反今次QE3頭五十二日,流入只有三百廿二億。

但以上比較,未必係事實既全部。好簡單,QE1規模係一萬五千億美金,QE3只得六千億美金。換句話,扣除呢個因素,正如中環人提醒,流入香港熱錢比例上,未必百分百一定少過上次。

熱錢問題再引起重視,雷鼎鳴教授上星期話,金管局可以增發票據抽走資金呢個概念,未必全對!

流入既錢,如果唔走,現行機制係無辦法沖銷。所以純粹結餘比結餘,依家當然遠比四年前少,但事實上,呢幾年貨幣基礎經已累積增加近六千九百億,係無跌過!!!

因為QE同各種因素,香港既錢呢四年內,係咪僅僅多六千九百億?又唔係!!!貨幣基礎唔係廣義貨幣,我地搵番零八年九月,同最新九月份既M3廣義貨幣供應兩條數,依家比當年既規模,原來足足多二萬五千零八十九億港元!!

資金流入引發既興趣,除左股市升幾多,樓價升幾多之外,亦要問自己,我地對現行本港既貨幣市場運作認識有幾多?

用零八,零九年既熱錢方程式,錢來香港,就係炒內地!!!

的確,當年聽來順理成章,亦百分之九十九點九有咁既可能,但調轉又問,A股四年內大跌,內地經濟四年間接近硬著陸,點解呢的經香港入既錢,並無反映喺本港資金池變動,毫無流走跡象?

難道,外資熱戀中國,四年未變心??

呢幾日,內地媒體煲大資金襲港,令人聯想當日既中央台熱錢特輯,引述專家云云,話經港流入內地熱錢千,萬億計,當日受訪者之一,黎友煥榜上有名。

佢咪就係,被冠為俱輯地下熱錢流入既內地專家!!

近日廣東省社科院就有個「境外資金異常流動研究組」(此名令人聯想起X File中的莫探員),就跟蹤左百多個地下錢莊,監控結果顯示,由九月下旬開始,境外熱錢加大了流入內地,認為監管部門需要高度警惕。
 
其實在內地媒體不難找到一些評論,認為熱錢襲港係源於中國因素,最終目標係通過香港人民幣市場進入內地。

內地有此想法當然不難理解,始終香港是背靠內地,香港好自然只因中國好。不過由A股同H股表現「開倒車」的影況,到底實情又好何? 恐怕早已是心知肚明!

沒有留言: