2012年11月30日星期五

小家.慷慨


從史上首次批股集資結論,李小加不單止絕非「小家」,反而仲相當慷慨。

近八十億集資,一家便宜三家著,自己有錢、政府低價溝淡、股份上板成交會增加、有幸分貨既基金更肥肉當前。所以李小加,其實係李慷慨。

受惠於小加既慷慨,約翰曾先掃三百幾萬股。七年前以一百五十四個四喺市場購入千多萬股三八八,俾人鬧足咁耐。依家,特區政府帳面成本,已經由一百五十四個四,降至一百四十七蚊左右。

等多幾年,港交所可換股債券百六蚊到價,約翰曾若仍然在位,一定要叫小加做恩公!!!

論受益,莫過於沽空港交所一眾對沖基金西人大鱷。試想,星期四沽空,但同時間一百一十八蚊獲分認購股份,只要星期一,港交所上唔番一二八個八,沽空不構成輸錢。

而單係以配股價獲分貨既成本計,今日高位,數字上每股已經賺左六個八。西人大戶比約翰曾更加叻!!!

中環人話,港交所以折讓百分之四點七至百分之七配股,市場隨即傳來嘩然之聲。無疑,折讓一成之內批股,係慣常造法,可惜,已經係過去式。

如果睇番近期被股東減持,或者配股集資既大型股份記錄,招商局國際,折讓幅度三至六,廿七銀娛,折讓僅僅半成,友邦前阿媽沽貨,更有溢價百分之二。

以港交所排頭,以三八八貨源,更以佢地清白之身既零批股記錄,中環人形容,小加今次,或者係慷自己之慨,當起偉大領導者既示範。SALUTE!!

有關港交所今次處子配股,星期四五點打後發生既一切,故事甚多。聽最多,固然係半個鐘內全數去貨。心水清朋友自會發現,今次三大承銷銀行,同上次三八八可換股債陣容百分百相同。

中環人話,早於CB之後,三大投行一早接獲主動查詢,內容綜合而言就係:有貨預埋我!!

有消息更話,唔少同時累積大量淡倉,但是與否,永遠唔會有答案證實。!!!

據稱,去貨之快撇除大戶早有部署之外,更重要係,承銷團配股期間,已經不斷放風,定價只會在中間!!

咁著數,亦有數得計,如果散戶都可以參與今次配售,有資格用一百一十八蚊攞貨,你話幾好!!

可惜,我地唔係大戶,小加唔識我地,亦唔會向我地慷慨!!!

國開證券成為港交所配股財務顧問,買LME形同代父從軍,已經被行動證實。世上只有阿爺好,能夠為國效力,絕對值得。

好快LME,可能會易名為HKLME,過百六億既代價,全世界話貴,錢已經籌曬,協同效應暫時難以統計,而短線而言,會計上有樣東西叫商譽減值,LME會否構成商譽減值,從而影響交易所業績大數,值得關注。

好肯定,港交所繼續鴻圖大計,包括大搞亞洲時段LME交易。但要記著,港交所系統同LME係兩回事,對方仍然係喊價,結算系統寄LCH籬下,按時間表,佢地要到二零一四年會先完成自行結算系統,咁,亞洲時段,又係咪吹大咗??

短期要留意,還包括港交所架構重組。以往,現貨、期貨、結算、上市,僅僅四大架構為港交所製造大量盈利,依家,多一間屋,都要請多個人打掃,更何況買既係過百年歷史既交易所。

雖然大家都無資格攞到配股「平」貨,都為香港、但願三八八一切順利,!!!

沒有留言: