又四年
唔單止成為各大電視、報章號外既封面，甚至喺Twitter 如 Facebook 更係瘋傳，簡單得來、亦令人對未來四年抱有一定期望!
大家都知，羅姆尼遲遲都唔肯認輸，喺傳媒廣泛報道之後，佢仲要拖多九十分鐘，先肯致電奧巴馬祝賀，而且佢個落選宣言，前後都唔夠五分鐘，可以列入最「Hea」既宣言之一!
羅姆尼唔服輸其實都可以理解，你諗下之前一晚道指一度升過一百八十點，「羅系」股分好似國防．工業．石油．金融．全掃急升．難免令人想像係咪有人收到風？
老套啲講，今次奧巴馬可以贏盡天時地利人和，雖然輸左第一場辯論令人大跌眼鏡，不過先有克林頓突然奮不顧身為佢站台，之後又有羅姆尼「秘密失言錄音」外泄，最後幾日連個天都幫埋佢，Sandy 成為左羅姆尼陣營最後一根稻草!
黃金戰士形容、今次奧羅之爭，就仿如一場資本主義之下兩個門派之爭：一個係福利主義形式、另一個就行番商界為首既資本主義形態。
不過我地認為用Main Street 對Wall Street，更貼合兩個人既作風，而結果似乎亦都證明，大部分選民係傾向選擇「大街」!
既然支持者落敗，高盛都要唱衰一下，形容喺兩黨仲係維持現狀、分別掌控參眾兩院情況下，年底前美國有五成半機會出現「財政懸崖」，最壞情況係兩黨一直唔能夠取得共識，將會拖低經濟三點五個百分點，令經濟陷入衰退。
當各界將一眾矛頭指向奧巴馬改善唔到經濟，其實有無考慮過，佢上任接落既、正係一盤爛無可爛既攤子，失業率升至９點１既戰後最高，而家回落到近７點８既水平，其實唔可以話無成績。
更重要係過去四年美股既升幅，累積達到六成七，係過去十年來表現最好 .
一係估值仍然偏低、市盈率１４點４倍比平均有１２％折讓；
其二就當然係靠佢，伯南克！
所以話除左奧巴馬之外，要開香檳慶祝一定係伯老，雖然之前佢放風話就算奧巴馬連任都唔會「再坐一會」，不過華爾街已經開盤口，相信佢會再連任，而一級交易商亦已經共識，係年底聯儲局就會進一步擴大ＱＥ３買債既規模同範圍，由ＭＢＳ伸延至政府債！
其實羅姆尼犯最大錯誤，可能就係太早太揚話要炒伯南克，結果「逼虎跳牆」，一招無限ＱＥ就令奧巴馬成功連任！
好似經濟學人咁講，佢地最後選擇站喺奧巴馬一邊，原因只有一個，就係「The Devils we Know!」
總好過羅姆尼前言不對後言，唔知佢來緊四年會「玩邊料」？
奧巴馬話、The best is yet to come！
但現實係未來四年，會唔會重複番過去四年既困局？
金融時報社評將個波交番比共和黨，認為佢地要好好思考，未來四年係咪只係一咪充當反對者，好似長毛咁一咪「反加稅」、「反Debt Ceiling」、「反對增加開支」?
對奧巴馬更有利，係選民似乎對財赤問題真係唔太介意，十個之中只有一個係認為值得憂慮，似乎美國政府大增開支、以投資救經濟既「凱恩斯」日子，未必離我地太遠!
留言