2012年11月9日星期五

蘋果燈神

話說喺選舉票數拉得難分難解之際,奧巴馬有一日到選舉中心拉票,本來預定劇本係由奧巴馬親自打電話比兩個選民、親自游說佢地投票。

面對眾多鏡頭,助選人員隨隨遞上一部iPhone比奧巴馬,點知總統大人攞著部iPhone,搞左好耐都打唔到電話,先比發現在場記者發現佢唔識用!

最後要改用番一個傳統既 Feature Phone,奧巴馬先打到電話,佢自己就解窘話,自己仲有部Blackberry!

當人人以為蘋果股價由七百美元樓下跌落嚟、轉捩點係iPhone 5推出之時,其實真正既「燈神」,原來係奧巴馬先真!

仲記得當日教主喬布斯「彌留」前夕,身體幾唔舒服,都答應出席奧巴馬一場商界集思會,估唔到教主咁比面,但總統原來對呢個「Made in State」最出名既品牌、一啲睇唔上眼,教主在天之靈,可能都心有不甘!!!

而家蘋果股價股價由七百蚊美元樓下,跌左超過兩成,技術上步入熊市,市場亦好緊張咁係咪代表美股都見頂?

兆富今日做左「併圖」,不看猶之可,一看真係嚇死人,今年以來標普五百既走勢、拍埋1987年股災走勢圖一比、趨勢無九成都有八成九相似,好果信圖表派,真係死得!

FT計過,蘋果公司損失既市值、已經達到近千五億美元,幾乎係成個「財政懸崖」四分一,更弊係對沖基金一直揸重貨,而家有230個對沖基金持有蘋果,持倉量係眾多股分之中,個市有咩「咿郁」,唔拋售蘋果都唔知可以減持啲咩!

不幸係壞消息一個接一個,好似iPhone 5被批評無新意,生產進度又追唔上,內部人事更出現教主過身之後最大糾紛,最新Q3出貨仲輸埋比三星S3,好難翻身喎!

或者我地又逆向思維,試下人棄我取!

MacDailynews 報道,有分析員指過去一個月困撓iPhone既生產問題、終於有解決跡象。

前兩日鴻海郭台銘都公開承認自己廠房組裝iPhone 進度唔理想,市場估計庫克會分散更多生產基地,生產問題估計有改善跡象!

而翻身之作可能要靠呢部iPad Mini、用過既人都大讚貼心,硬件雖然唔係最強,不過配合蘋果IOS 同剛剛好既呎吋,好多用家都一試傾心,原來秘密武器唔係iPhone 5,而係呢部iPad 小兄弟!

有大行計過,以2014年蘋果預測市盈率只有9點2倍,遠低於歷史平均十二點一倍水平,雖然未來盈利增長未必再有過去兩年六至八成升幅,但穩中求勝,未必無可能。

更重要係幫蘋果生產晶片既高通、最新業績不但遠好過預期,對出年既展望,更係異常樂觀!

或者對庫克來講,而家最大不明朗唔係三星或者亞馬遜,而係「燈神」奧巴馬,因為好似FT評論咁講,一旦財政無法解決,財政部勢必向企業大幅加稅,其中重災區正係向企業海外盈利徵收苛稅,呢方面正係蘋果一向強項!

奧巴馬或者真係唔識得同iPhone,不過今期經濟學人就對佢未來四年任期,抱有好大期望,封面係佢勝出大選後Twitter 抱著Michelle 相片,caption 就係「係時候都抱一抱共和黨人」,呢個可能先係淡友最大「黑天鵝」!

沒有留言: