2012年12月31日星期一

2013

寫BLOG 有個好處,就係可以定時定候,睇番自己往昔觀點

在2011年12月31日,當日寫上:
「作為投資者,今年唔值得留戀,凡事從好方面諗,今年實在太差,出年未必唔好。
但從另一角度想,西方衰夠,意想不到既震撼事件,可能喺東方發生。
中國概念硬著陸,印度潛在火山爆發,仲有再融資高峰期,債券供應大增,企業要高息發債,西方經濟唔得,結果出事唔會係歐洲,而係亞洲。」

不敢說預測,但「東方」的確是有意想不到的風險!

2012年,有歐債、有懸崖,問題未完全解決,但末日總算過咗。

今天,向2012說再見,即將倒數迎來2013,但現實係,倒數既可以充滿期盼,倒數更可以滿載憂慮、同恐慌。

金融市場經歷呢三百六十五日,與其說經歷波折,倒不如話係順風順水。

港股升兩成幾,人人話炒股唔炒市,但一年有兩成幾回報,就算炒市,約翰保爾森如果一年前單炒港股,已經咸魚翻生!!!

同樣,中國話怕硬著陸,依家又被冠為全球最高增長概念市場。希臘債券回報跑贏全球;歐洲依家已經憧憬復甦;

美國?邊有事!2012年再次印證,跌市無需害怕,萬大事有央行保護。

踏入2013又會點?喺歐洲信貸危機轉穩,同央行繼續無限量寬鬆情況下,全球會進入「危機後」嘅第一年。

分析普遍建議將錢「由債轉股」,確保投資跑贏通脹。

咁買邊度好?自從11月底、跑贏美股表現以嚟,歐洲股市今年回報超過1成3。

有管理家族資產嘅基金經理話,連續4年跑輸,歐洲單係追落後已經有好大空間,出年繼續有得炒。

新興國家又點呢﹖金磚國當中,雖然中國無出現傳說中的「硬著陸」,但巴西嘅經濟增長放緩咗。

令人擔心嘅仲有印度。面對高通脹、低增長,但政府毫無對策。

展望將來,睇吓金融時報嘅專欄作家點預言2013。

幾時加息?出年未必會。

四大央行政策已經係極之寬鬆,但係喺加息前,應該要先壓縮資產負債表。

美國經濟又點?好轉係市場共識,但受財赤、出口轉弱,同樓市緩慢復蘇困擾,出年增長最多得百分之2。

的而且確,環顧今年一眾預測,有別過去兩年,今年只有憧憬,沒有恐懼。

由街市到半山、由中國到南美,市場上、中、下層不同持份者,主題係明年升幾多?所謂主題風險,老實,已經懶得想,或者數不到!!!

即將踏入新一年,掃興無謂,市的確可以升到你唔信,因為市場雖然人為因素主導,但市場亦離唔開結局往往出人意表。

如果要揣測潛在風險,抱歉了!! 今年,唔計日本、不計英國,歐洲以及美國已經無限量印鈔,市場以為無限量印鈔係建基於經濟形勢既判斷,但實際係,無限量印鈔僅僅係由一個電腦方程式FERBUS去做基礎。

伯南克斷言,失業率即使回落到六點五,通脹都唔會抽升,絕非佢學術強項經驗了得,而係靠一條名電腦公式,用數百個不同事前假設得出既結論,而記錄顯示,呢條公式其實出錯多次!!!

當然,財金官員,央行巨頭,以至星級經濟師可以繼續話:無事、放心!!!

但影響全球福祉既政策,既無前車可鑑,亦無實戰經驗,靠既係一條公式,又怎可以放心!!

沒有留言: