2012年12月13日星期四

無限對無限


今次真係唔叫佢做「聖誕克」都唔得,之前市場最多以為聯儲局只會喺OT完結後加馬買債,而家居然連市場無預期既利率掛勾指標都做咩,真係比伯南克「晒冷」嚇親!

公平啲講,唔係無經濟師預期佢會將利率同失業率掛勾,只係無諗過咁快會推出!

聯儲局結束今年最後一次會議,喺推出新一輪買債計劃同時,並且首次將利率政策、同失業率以及通脹預期掛勾。

你會問、點解會將失業率定喺6點5?通脹率係2點5?呢兩個都唔係聯儲局長期既目標水平?

伯南克自己首次用Optimal Policy「最佳政策」目標,去形容呢兩個指標,更指出呢個係經過數以萬個數學模型、模擬經濟狀況得出來最符合「利率通道」既指標!

呢個講法令我地想起琴日講過伯南克出身既MIT經濟工程師呢個新聞!

無論如何,好似華爾街日報形容,今次係副主席耶倫為首嘅鴿派委員,一次重要勝利。

看看呢兩件震驚市場事件,包括: 改寫美國貨幣政策歷史,毫賭一鋪,SHOWHAND!

其次係將貨幣政策直接同經濟數據掛勾,表面提高透明度,實際係令退市更難捉摸,體現實則虛之既強勁武功!!

當中涉及既兩組數字,亦即時令市場討論,到底有關預設條件屬於「AND」定「OR」。係一加一?抑或是旦一項??

其實,簡單一個經濟學說,PHILLIP CURVE、菲力普曲線正指出就業同通脹成正比。

問題係,近廿年嚟,經濟學家經已幾乎推翻菲力普曲線,原因有二,包括: 幾十年前,曲線設計師無假設有結構性失業,以及無假設到有結構性通縮!!!

伯南克可能早知市場會揣測只要數據繼續好,退市勢將實現。於是佢有備而來,講明,就算失業率低於百分之六,但如果通脹預測仍然低企,並如果其他指標唔過關,聯儲局絕不退市。

要留意伯南克提及兩個前提:其他指標,同埋通脹預測。

記著,係預測,通脹預測全球央行都有做,但最唔準確,更甚係數據係死,預測係生,為延長寬鬆任務,堅持唔退市的話,俗些講,聯儲局大有動機可將經濟情況「屈機」,從而扭曲預測,又或者索性下次再修訂退市門檻!!!

可以肯定一件事係、往後一段日子,流入本港既資金必然相當可觀。

十月到依家,經銀行體系流入既資金超過八百億,銀行界由唔相信結餘增加、到認為資金僅僅少量流入,到依家已經封口拒絕預測,因為變化太快,世事難料!!!

截至十月底,本港貨幣基礎有一萬一千幾億,計埋十一月同今個月流入既資金,貨幣基礎肯定坐萬二,望無限!!!

呢萬二億,基本上拍得上本港生產總值,除番勻,分俾七百萬人,亦相當於接近一一年人均生產總值數字!!

如果資金繼續入?如果資產價格升?呢兩個問題,伯南克變相俾左答案。

市民關心,但財金官員依然逃避。陳總裁在北京,雖然稍改口風話今次接市規模唔會多過0809年,但一句金管局可以無限買美元、沽港元,以無限對無限,恐怕思歪政府今次好頭痕!

我地都不止一次提過,結餘水平二千多億,金記長老一定有壓力,但抽結餘不能,改勾亦量佢不敢,餘下方法,其實所剩無幾!~!!

中環人擔心,香江官府有可能使出負利率一招。點解?因為,丹麥係咁,瑞士兩大金主,瑞銀瑞信亦係咁,以香港官府喜歡搬字借「橋」,人地都係咁做既性格!! 行負利率,未必無可能!!

其實,過多月前,結餘增加趨勢確認之日,早有傳金記,銀公有傾過向結餘徵收利率,傳聞唔一定真,但任白頭比攞命更熟貨幣發行局運作,佢三十幾頁論文,確實有提過呢個工具!!!

總之,好戲或者在後頭!!

沒有留言: