2012年12月14日星期五

無限之人



銀行公會訪京團,變成熱錢流入解說團,因為陳德霖一句:有無限創造港元,無限承接美元沽盤能力。

中環人封佢為無限能力偶象哥!!

無限能力偶象哥率團訪京,不同部委唔同會晤,其實為的是人民幣業務發展。有留意的話,無論偶象哥,抑或銀公馮一姐,提及有關在港人民幣業務既新建議,新討論,大部份依然陳腔濫調,空泛得很。

香港確認為人民幣離岸中心已有三年,陳德霖偶象哥今時今日,仲高調要求內地放寬二萬人民幣每日兌換上限,中環人問,到底係反映本港銀行界滿足於目前人民幣業務現狀,無慾無求,抑或係金管局根本視而不見,不知問題所在。

偶象哥話,人行副行長易綱對放寬每日兩萬兌換上限建議,反應係會研究。銀行界話,對方擺明有禮貌HEA你!!

人民幣兌換上限,討論多年,關閘唔開,歸根究底係牽涉內地資本帳開放。要知內地唔係唔開放資本帳,但只會逐步,如果將二萬兌換上限,即時上調到一如外界盛傳既八萬,技術上幾乎等於人民幣全面自由兌換,因為只要有港紙,就可以大量兌換!!

況且,兌換之所以有上限,係港元要經上海交易中心兌換人民幣,簡單講,香港人由港紙轉存人民幣,接我地港紙唔係銀行,而係人民銀行。

人民幣如果單日要大幅提高接港紙上限,由於匯率前景問題,基本上叫人行硬蝕,邊個會肯!??

銀行公會馮一姐話,人民幣資金池要發展,因為在港發行既人民幣點心債資金大部份調返內地。呢個其實係部份銀行既認知問題,首先,有資金用途至會發債,企業發人民幣債固然有用人民幣既需要,好自然,大部部會調返內地?

況且,調返內地問題,除左企業商業行為同決定,千萬不能忘記,銀行其實有幫一把。據講,早期市況靜,本港銀行提供各式其式既套息,套戥建議,例如香港籌,內地存等等,當時早有中環人話,堂堂一個離岸中心,只懂玩中港套戥,太不健康了!!

人民幣三個字,中國以外,香港號稱全球第一。但睇睇,人民幣存款由六千幾,跌到五千億左右,更慘係,在港人民幣貿易結算及兌換,跌穿二千億,佔全球整體人民幣結盤比例下跌,數字比八月,兩個月內跌左兩成有多。

中環賓卡話,香港人民幣業務剩餘賣點,僅僅係結盤系統經呢度,其餘以發展步伐,倫敦都不如。無進步反而退步,賓卡埋怨,金記偶象哥領導下,之前關卡太多,處處限制,簡單講,搞衰左!!!

有資深行尊越講越火滾,大數偶象哥三宗罪:包括之前對人民幣存款量增幅太早自滿、第二係,對銀行規管太緊,特別係有關人民幣流動頭寸要求,導致銀行幾乎只收存款,但無其他業務,最後第三係,貿易結算要求多多,要銀行查東,又查西,要睇文件,又核實訂單,呢個「認清客戶」既準則,令好多潛在客戶蟬過別枝,轉到新加坡,倫敦!!

據講,上述好多要求,並非出自人行手筆,即係有人自作聰明。亦據講,陳總偶象哥很多時,會大膽假設,例如內地當局批準香港做A,B兩件事,佢會以為連C都得。結果,有幾次就此中伏。

睇嚟,陳總偶象哥既無限能力,或者係能力,只適用於接錢!!

沒有留言: