中國龐氏騙局



內地金融體系,你話佢有事,但依然無事。你認為佢無事咩?但從來又唔係完全無事。

買華廈理財產品損手,示威之餘,觸發相關產品潛在風險既討論。

銀監會更要介入,形容事件影響惡劣,令監管層憤怒。投資者三百萬買建行信托產品,又傳虧損近半,銷售誤導。

資產質素,壞帳上升,潛在風險等等問題,唔係近一、兩年既事。內地金融體系能夠力挽狂欄於不倒,資產管理公司當日,擔當壞帳吸塵機,可記一功。

呢批資產管理公司,當日極其量其實係篤數,不良資產話接收,但繼續留在銀行帳簿內。信達算係第一間啟動移形換影大法既資產管理公司,一直話上市,結果無!!

話加大再接收其他資產,都無。但佢地近日,一發廿億人民幣點心債,超額之外,更成為首間無獲得評級而又成功發點心債既公司。

信達個案,簡單嚟講,就係垃圾有人爭。內地金融體系資產質素憂慮依舊,地方債、內房債、民企債、原來最大件事係財富管理產品打包而成既債上債。

信託理財產品黑洞,有人歸咎投資者大貪。但無諗過,監管者其實催化過程,咩都有限制、水緊不放水,早於年初溫州問題曝光之後,其實大事不妙先兆。所謂產品,其實係集成產品,銀行變相為高利貸市場籌集民間資金來源,借款人無錢還,涉及金額愈多,爆煲機會愈大。

可悲係,內地監管者經常想大事化小,更令人不滿係銀行部份企圖側側博、唔認數!!

無疑,出年經濟比今年好,係市場共識,但無人敢講,經濟好,債仔一定有錢還,更無人提過,內地資金鏈緊張,事實已成。有資金緊張問題,銀行有意圖繼續爭存款,財信產品只會更氾濫,不會受控制。

資金何解緊?首先,企業睇錯市,大量美元長倉未賣出,形成人仔需求急升。要搞清楚,呢個唔係部份學人講既憧憬經濟好,資金流入造成的升值,而係睇錯市因素帶動。

更甚係,內地銀監發明中國巴塞爾呢個東西,舉例,目前銀行拆出三個月以下同業市場資金,計算風險資產權重比例係零、三個月以外同業貸款,風險資產權重比重係兩成。

但一月一日起,全數收緊,由零變二十、二十變廿五,即係銀行單係拆出同業資金,已經要即時提升風險資產權重比例,變相影響資本充足比率。

結果係,同業息率會叫高,或者進一步減少拆出。美林講明,出年內地銀行拆出三個月期拆借資金,一定會減少。

另外,新資本規定之下,非銀行以外既債務,銀行要計足百分之一百風險權重比例。影響之下,基金、保險等等內地金融機構,借錢要俾高息,而佢地自行發行既債務工具,喺銀行貼現功能大打折扣。

咁即係會點?全城金融機構會高息爭錢!!

無論內地經濟目標,七、八、九,根本係一個數字。但經濟好,貸款多,借貸旺,黑洞又豈不是愈谷愈大。

惠譽提到.今年有八成半嘅理財產品.由合資銀行、城市或鄉村銀行出售,呢啲銀行嘅存款基礎較弱,最易出事。

內銀連接爆出財理產品黑洞,內地業界分析歸咎,除左係資金緊張局面造成之外,更大問題係,銀行資金直接入市一直無開放。

造就目前利用財產財品隱性投資局面,並形容,呢個係良性龐氏騙局。

內地媒體多日連載信託相關產品,以及其他拖數問題報道,全部十八大之後發生,時間之巧合,報道之頻密,一個字,怪!!

留言

此網誌的熱門文章

「急於求成」 JPEX 爆煲引證證監會監管不力

減辣不單徒勞無功 甚至「好心做壞事」

三十而立的金管局:思良將