腳踏實地


你要派糖,曾俊華呢份預算案,百分百令你失望。

但爆其大冷,曾俊華呢份預算案,被中環人譽為,係佢在任財爺以嚟一大傑作!!!十分滿分,最少值九分!!

曾俊華固然唔係自比第廿六任美國總統羅斯福,但云云六十多頁演辭,約翰曾最精彩一句,正係引用羅斯福總統既名言:「Keep your eyes on the stars and your feet on the ground」(要遙望繁星,也要腳踏實地),用一個通俗既解釋,就係發白日夢之餘,都要睇餸食飯!!

正因為呢句,中環人俾個LIKE佢!! 想胡亂派糖?無、醞釀亂花儲蓄?唔好諗、動搖本業,漫無目的發展?

睇路!!曾俊華毫無疑問帶出上述幾個暗藏訊息,連消帶打之餘,企圖撥亂反正,約翰「去CY」之說,由此而起!!

CY喺經濟發展上既政府角色,不下多次定調要適度有為,但約翰曾雖未致於積極不干預,但大市場,小政府味道極濃。整份預算案,曾俊華充斥既精神係,市場由咩主導,就由佢地繼續主導,政府更會提供配套,但錢不會多花。

梁振英參選期間,講過香港過份依重金融,施政報告除偉大祖國人民幣概念之外,其餘著墨不多。曾俊華反過來,開宗明義話,金融養活廿三萬人,經濟貢獻一成六,應加重視,更要提供協助,增加競爭力!!

因為咁,曾俊華免稅招攬私募基金,法規條例修訂,吸引更多對沖基金。

有人會問:經過97年打大鱷,今次莫非引狼入室?

非也,以全球對沖基金連續三年跑輸大市既表現,今年以來回報僅僅百分之三,殺傷力大不如前,對沖基金已經由大鱷,淪為小羔羊一隻!!

香港有對沖基金,註冊,營業,加加埋埋,截至九月底,在港對沖基金規模已經高達四百七十一億美金,逆市多近七十億,比新加坡突出。

但新加坡舊年大幅修改發牌條款,兼予以稅務優惠,與其讓敵人投奔敵國,做我世界,倒不如留著對沖基金,方是「難為知己難為敵」!!

反而CY提到要搞商品市場,明益自己人巴利.張,點知財爺當無到,一再唔比面!

其賓睇曾俊華「腳踏實地」的圖晝,佢眼中香港不再是要「朝行晚拆」,明言「量度今天的生活水平,不應再用昔日標準」,明眼人話同CY在施政報告中提及香港仍充斥「大都市璀璨背後的陰暗面」、「山邊木屋和天台屋」,完全是兩個圖畫!

曾俊華搞債市,亦係野心之作。佢將政府發債上限,提升至二千億港元,按此計算,正正符合納入環球政府債券指數基準既二百億美元等值要求。

但約翰未算腳踏實地,因為環顧香港政府債券,十年期債息率僅僅一厘一,比美債於七十點子,邊個會買港債??

有人話,小曾預算案將CY派餅藍圖全面推翻。以地為例,梁營公屋,居屋行先,曾俊華卻吸引外資基金駐港,大搞物流,寫字樓地遲下更會爭崩頭。

CY同梁粉一直對財政儲備食指大動,武功曾簡單一招亦技術性擊倒!!

呢一招就係人口老化,預算案第一百三十三段起,極多篇幅觸及問題。的確,最新預測到二零一八年,本港儲備會突破八千五百億,但約翰話,六十五歲人口佔比,好快會超過三成,稅制不變既話,收入就會大減,儲備就會少。

呢個問題,既為日後稅制改革,擴闊稅基同儲備適當水平檢討,埋下重要伏線,亦為曾俊華留下更大影響力!!果然高招!!!!!

留言

此網誌的熱門文章

「急於求成」 JPEX 爆煲引證證監會監管不力

三十而立的金管局:思良將

減辣不單徒勞無功 甚至「好心做壞事」