家庭負債
陳德霖愈嚟愈似一個專業分析員，一時一樣，訊息可以完全不一樣。
上星期俾立法會文件先話，新造按揭既按款對收入比率降至三成六，以證銀行體系穩定，周一卻喺立法會引爆家庭負債接近歷史新高呢個數字，係補鑊，抑或知道大事不妙，要盡快俾市場多角度分析，動機只有佢先會知!!
首先，陳德霖今日披露既家庭負債佔GDP數字，話新不新，話舊不舊，事關無論IMF，經濟學人，以及私人顧問機構，都有經常計算。
的確，香港最新既家庭負債佔GDP比重升至近六成，比較歐美八成至過倍計仍然屬於偏低，更別忘記，香港儲蓄率有超過兩成半，實力上仍然有優勢。
但經濟師話，家庭負債佔GDP比重呢個數字，套用本港情況有偏差，因為香港經濟太側重金融，地產，造成過去多年，經濟數字好，市民感受唔到。
要真正計算市民係咪過度借貸，反而應該睇家庭負債對可分配收入比率，即係HOUSEHOLD-DEBT TO DISPOSABLE INCOME RATIO呢個數字。
如果根據數字，本港家庭負債佔可分配收入，記錄高位係零三年，當時比率達到百分之九十，而最新現在既數字，就岩岩好升至八成多的，肯定遠遠超過六成呢個比例，而數字上比泰國、中國、印度、印尼仲要高。
肯定，呢個數字較陳德霖講既家庭負債對GDP比率，更反映市民係咪過份借貸，而答案的而且確係!!按比率計，香港家庭依家已經相當於搵一百蚊，就同時借八十蚊。
同一時間，如果睇番金管局首次詳細提供既家庭負債分配，信用卡及其他個人貸款，四年內急升五成，比按揭貸款同期三成六升幅仲要多。
詳細睇，香港家庭無押抵貸款，比重升至兩成六，較九七亞洲金融風暴時更要高。
攞命陳今日用家庭負債大做文章，其實值得一讚，因為直接了當交待香港人近年，借得多，借得勇既現象。但佢或者唔敢將數字涵蓋層面進一步拉闊，否則一定驚嚇整個立法會!!!
所謂數字涵蓋層面拉闊，意思係睇曬整個銀行體系批俾個人同企業在內既整體信貸量佔GDP佔例，相等於CREDIT TO GDP RATIO。
聽著，香港二零一二既比率係高達百分之二百七十五，比零七年股市爆煲期既一倍八仲要高。憑著信貸量佔GDP近三倍既數字，香港跑在亞洲最前線，區內過度借貸最多，比新加坡，中國，南韓更加嚴重。
呢個數字絕對唔係「老作」，係匯豐之前統計，華爾街日報亦大篇幅報道過。有人會反駁，認為香港金融機構屬於區內既LOAN HUB，信貸部份其實係批俾本港以外個人，或企業，所以不能作準。
不過就算我地將比例由百分之二百七十五減半，所得出既超過百分之一百三十五比例，仍然超出亞洲舊年平均既一倍水平。
講咁耐，我地認同陳德霖提出本港過度借貸問題。IMF亦做過風險評估，整個區內計，信貸量每年升半成，股市每年升一成半，區內兩年後，就有最少兩成機會爆煲。
美國量寬，低息，伯南克想見既借貸上升，嚟曬香港以至區內。基於機會與成本，對企業同公司嚟講，低息環境，唔借錢就笨。
金管局提出問題，應記一功，但始終迴避問題既根源，就要再扣十分!!
留言