2013年2月7日星期四

淨化


唔係澳門股近日既跌勢,投資者未必會知邊個係譚伯源。

作為澳門財金官員NUMBER ONE,佢首次承認,當局會加強「疊馬仔」監管,強化制度,兼且會同執法部門共同「淨化」博彩業經營環境。

譚伯源言論一出,再次體現咩叫狼來了的故事。如果今日睇各大券商報告簡評,大部份話跌勢反應過敏,部份認定係嘈音,但留意盤路,大行一邊撐,卻一面沽,情況等同周三泰吾士報一出,股價未開市前已經集體大幅MARK低,係咪早有空穴來風,不得而知。

疊馬仔角色,就好似樓市入面既銀行一樣,水頭一缺,行業就係咁先!!

當然,澳門當局未有透露加強監管詳情,但譚司長提及既「強化」,又要「淨化」,中間更涉及執法當局配合,等等用詞,可以想得好立體。大行會否轉軚,就此晰目以待。

疊仔馬一收緊,貴賓廳業務必定首當其衡。高盛明言,影響難以量化。但如果睇番細份,貴賓龐佔金沙,銀河收入比重超過半成,整個澳門博彩業計,嚟自內地VIP客佔比,由四年前兩成,急升至超過一半。如果中央落ORDER,博彩股長生不老、長升長有神話,係咪就此玩完??

肯定,股價表現一定有不明朗因素。須知,澳門博彩股目前高估值,係建基於增長概念。統計幾間大行,對澳門今年博彩收入增長預測介乎一成半至一成八左右,一旦增長原來只有單位數,估值下調係自然既事。

VIP收入,對整個博彩業起關鍵。大行計過數,今年全年VIP基本收入增長係一成三,整體博彩收益係一成六。如果前者萬一係零增長,澳門今年博彩收入增長就會大幅降至百分之七。

到到更差既情況,VIP收益今年係倒退百之十的話,澳門今年整體博彩收入就會無增長,而六隻博彩股,有五隻既全年EBITDA錄得負增長!!

當然,資料所限,任何計算依家都流於斷估,呢一刻可以講到影響重大,但當股價無跌,到時又會話無影響。

值得留意係,習近平上任頭炮,擺明打貪,中央政治局會議首次發言,亦告戒官員要低調。

首當其衝嘅係一眾要效法嘅國企,各式各樣嘅慶祝會急急被叫停,有傳建行原本定喺五點鐘開始嘅年會,喺兩點時先發短信話取消。

中投、同中石油都話,取消咗今年嘅年會,爆出買天價酒、天價吊燈嘅中石化,喺總部嘅慶祝會都取消咗,其它分區嘅年會,規模都大減。

好似浦發銀行,員工喺採排緊、對客戶年終答謝會嘅節目時,突然收到通知話晚會取消。

由於政令嚟得急,訂好哂嘅酒店宴會廳,引發退訂潮。全國嘅金融中心、上海,酒店年會退訂率平均最少三成。

有酒店指,退訂咗三百圍枱,損失七十萬人民幣。

節約不浪費是好事,但今次大鑼大鼓禁高調,就有點變成擾民,亦難想像到底力度可以維持幾耐!

央視,央台農曆年期間,連名牌貴價品廣告都一概不播。新意識形態同政治環境下,分析中資股,莫非比以往更難??

沒有留言: