2013年2月8日星期五

送龍迎蛇


送龍迎蛇。里昂話,蛇年會有巨變,其實邊一年會無巨變?

佢地強調,蛇會脫皮,但試想,十二生肖豈止蛇會脫皮?龍無人知,但最少鼠、狗、雞、等等,通通都係脫毛動物!!!

舊年,劉老師一句「龍游淺水遭蝦戲」仍然令人回味無窮。龍年是否進步,豐收?閣下自知。

至於十二個月後今日,誰是蝦,投資場外我地被邊個戲弄於無形,趁大掃除之際,作個檢討,出年以此為戒!!

蛇,部份有毒、外型亦不討好,佢地唔會殺人於無形,因為俾佢食左,條蛇消化要一段時間。引用沈大師判斷,危機會大,變動會多,投資場上,或者要按照提議,有如蛇咬人一樣,「快食,快閃」!!簡單講,有得執就執,切忌長情兼大貪。

無疑,過去三個蛇年,大事一個接一個,次次皆跌市。但如果做人安心,樂觀應對,年年都係好年。

無八九年,伯恩斯坦唔會可以在柏林圍牆下、有歷史性指揮快樂頌呢一幕。

無科網爆破,亦唔會跑出一批真正利及人類既科技公司,所以,咪信邢!!

里昂風水指數,沈大師認為,股市七月之後要小心,蛇年底低位,會比依家更低。熟假熟假,一年後自有分曉,但調轉諗,朋友,仲有半年我地炒!!

蛇年利「金」,「水」,引用名家推介,金融,消費,運輸,娛樂都要留意。但地產就小心!!!

最樂觀時間,就應該預先審慎悲觀,市場現時一片光景,你話無危機?呃人咩!!!宏觀因素,歐,美,日本隨時左右大局,製造升浪,亦可以構成震盪,早幾日我地領教過!!

個多月嚟,歐元愈升,日圓愈跌,股市愈靚仔,用羅家聰博士幅圖,本月廿八日是分水嶺也,從近期情況睇,KC預測,似乎近磅!!!!

至於一月分數據通通爆頂,先有外貿表現出奇地好,之後不論新增貸款同社會融資,全部係多年新高,社會融資更係較二萬五......千億,破盡紀錄。

莫非習總真係要為自己未來十年開個好兆頭?一開波就全力去馬,反而令人擔心後勁無以為繼。

的確,按月計,進出口各跌超過半成,外貿改善,但暫時唔談唔上加快改善,鐵礦石進口量按月跌近百分八,似乎要好似陶冬博士咁講,多看一兩個月數據先有結論。

內地帶嚟憧憬,亦可以製造憂慮。年頭效應,季節性因素,數據好壞都可以自圓其說。從最新公佈數據睇,通脹按月升幅,一年最多,工業品出廠價,同原材料投入價帳幅,舊年四月以嚟最大。

通脹觸低之後,唔知幾時大行分析師會改口預測加息時間?

點都好,立春過後,新年依始,一切就等埋春節打後,盈利,經濟指標再作決定。祝大家新春大吉!!!!!

沒有留言: