獨大
中銀香港近乎破天荒，調升清算行存款利率，被中環賓卡認為，著數不多，但就埋下危機。
香港人民幣業務，大好獨家優勢，俱往矣，星，台夾擊，再加倫敦，人仔離岸市場從此多事。
首先，咩係清算行存款息率？簡單講，係經營本港人民幣業務既銀行，過剩頭寸，可以存在中銀收息，呢個利率，正正係清算行存款利率。
觀乎今次加幅，僅僅零點零一九厘，即係行內人講，一滴多啲，數字上同台灣睇齊，但由於當地清算行中行台北分行同時提供既清算行存款年期，比香港多三種，息率比較，中銀香港新加入既一，二，三個月清算行存款，利息僅僅兩厘二，至兩厘四，寶島單係七日期已經去到兩厘七。
結論係，中銀無損失，本地銀行亦無著數!!
中環人話，中銀就算再大幅提升清算行利率，對銀行停泊資金吸引力有限，事關內地息率高，可以套息，反而金管局舊年老早就放寬人民幣業務銀行現金頭寸規定，再肯放落中銀，或者深圳人行，除非果間銀行係「傻」。
但點解小小加息一滴，帶出香港人仔業務危機疑云云？皆因獅城愈戰愈勇，監管無金記攞命咁嚴，外匯交投亦多，更重要係最近正式加入工行作為當地清算行，中環十個賓卡，十一個都話係最大殺傷力一次。
原因好簡單，工比中，工行規模贏，工比中，工行客戶亦多。數字上，截至舊年年中，中行LOAN BOOK係四萬七千九百幾億人民幣，當中三萬二千億係公司類貸款。
相比，工行LOAN BOOK八萬多億，公司類貸款五萬三千億，呢類公司貸款，正正係人民幣貿易結算既潛在客戶!!!
資深賓卡直言，中行知道工行勇奪星州，眾人騰雞異常，貸款量佢地一定輸，貿易相關LC，工行拋離中行，但呢個表面係中工分爭既問題，其實係港，星競爭加劇起端，因為工行以後有客戶做人仔結算，一，一定自己納曬，二，就係索性獅城進行，唔用香港。
聽完，大家明點解大好形勢不再!!!
有銀行話，中銀香港今次象徵式上調清算行存款利率，意義大於實際。因為本港人仔，同台灣人仔報價，即係CNH，同CNT，價差唔夠七十點子，銀行犯不著港，台資金互調套息。和廣北希望係加你一滴顯出誠意。
中銀既如意算盤係，保著香港既人民幣資金池，中行台行再壯大當地人民幣業務，屆時港台人仔資金互通，一切盡在中行掌握中!!
業界觀察，台灣人民幣業務比香港更有前途，佢地早前首日接受人民幣存款，已經盡爆寶島，而最近，當地個別人仔債，債息成本比香港低一厘，吸引極大，連德意志銀行已經改赴台灣發點心債!!
目前，台灣係內地第五大貿易伙伴，只要有十分之一對內地貿易用人民幣結算，就會製造額外五千二百億人民幣資金。所以，好快，台灣人民幣資金池會超越香港，問題係，台灣無金融產品，市場深度唔夠，只要香港有足夠人民幣產品，台灣人仔大部份會經中行系統流入本港。
中銀一點九滴加幅表達誠意，要守著在港過剩人民幣資金唔好流入工行手中，但往後一切，港，台能否連線，抗衡工行獅城戰隊攻擊，責任就在李小加。
亦因為咁，怪不得「中產曾」預算案內，大提金融，力谷物流。
無疑，本港離岸人民幣業務優勢仍在，但中環驚緊一樣野，就係獅城在先，如果阿爺向倫敦另批清算行，而唔需要經中銀香港，咁....大家應該知咩事!!!
留言