2013年3月13日星期三

加息


今次銀行加息,簡單講,係金管局陳總裁迫出來!

滙豐表明,加按息係考慮到現時按揭市場情況、和營運環境變化,認為有需要調整新造按揭息率,加強銀行風險管理。

大銀行率先出手加息,之前傳咗成個星期,而家第一步,新造按揭息口,加四分之一厘。

計下數,假設每一百萬嘅按揭貸款,供二十年期,最高三厘四咁計,每個月供款5748蚊,比之前供多127蚊,供多2%,表面睇好似唔係大數目。

不過要知道,可能唔只加一次咁簡單,因為自從金管局上調風險加權比率之後,銀行嘅資本成本提高咗,加息係勢在必行,有按揭代理都預期,按揭息口有趨勢仲會再調高,亦開始有銀行收緊咗按揭審批。

代理指,加息、直接加重市民買樓成本,而家最唔明朗嘅、係一旦各大銀行一連串咁加上去,係會令市況冷上加冷。

因為之前政府連環出招壓抑樓市以嚟,成交已經大減,過去一個星期為例,全港35個大型屋苑,只係得30宗成交,仲少過 03年沙士爆發之後嘅低位,証明而家個市相當淡靜。

至於樓價係咪終於要跌?

有發展商預期,今次加按息幅度輕微,加上利率仍屬偏低水平,預期不會對樓市及發展商推盤做成影響。

確實喎,何文田豪宅地、同東涌商業地開標,雖然銀行早就事先張揚會加息,加上政府再出辣招似乎無影響發展商部署,其中何文田地皮由嘉里以116億幾中標,樓面地價過萬元。

出價進取,除咗係市區罕有大型地皮,可建樓面有百一萬方呎,無限呎或限量要求,亦造就發展豪宅。

發展商對商業地需求一樣大,遠至東涌的商業地,上星期收到9分標書,有啲打算發展酒店、有啲就打算做商場,最終由同區商場東薈城的五大發展商,即係太古、新地、恒地、新世界同恒隆組成的財團中標地價23億幾,遠高過市場預期上限4成,每呎樓面地價4千3百幾元。

似乎商業地有價,呢個現況暫時無變,又沽且看政府幾時會出手!

沒有留言: