2013年3月14日星期四

自製加息



美國遲遲未加、香港率先加息,樓市凍過水!

匯豐、渣打、恒生相繼加息,三大銀行喺現樓按揭市場佔有率,加埋大佔五成六,影響力唔細!

第一步,先加四分一厘,睇下供款佔入息比率有咩變化。

加息之後,最優惠利率P 掛勾嘅平均按揭利率,將會由 2.15厘、調高至2.4厘咁去計,供樓負擔比率會上升到 40.4%,升幅係 1.1個百分點。

至於喺 P+3 嘅壓力測試之下,供樓負擔就會由 48.8%、上升1.3個百分、去到 50.1%,亦即係啱啱觸及銀行規定嘅警戒線。

多個發展商都口徑相同,話加幅好輕微啫,唔會打擊佢地賣樓訂價,真係?!

實情係,主導權喺金管局手上!

性質上,今次唔係真正加息周期來臨,而係金管局提高銀行嘅資金成本,曲線咁推高按息,再加埋壓力測試 P加三上去,等於香港自製兼提早加息!

借助上調風險加權比率、去提高銀行資金成本,迫住銀行要加息轉嫁比買家!

金管局仲會唔會加碼? 如果要配合政府壓市嘅目標,咁加幾多先至夠?

呢個先至係呢一刻樓市、最不明朗嘅風險!

匯豐、渣打一話加息,各區二手屋苑都有業主隨即減價賣樓,幅度由百分之一至十都有,加息對樓市嘅心理威脅有幾大?加一次、已經睇到!

面對樓市成交冰封,施老闆有合理懷疑加息是政府施壓,不是銀行自己的意願。

原因簡單,以發展商為例,無生意就會增加優惠,難道仲提高售價? 而家銀行唔單止唔肯減息,仲反其道而行,加按息,真係想趕客?

有銀行界人士坦言,未來銀行是否再加息,已經不單是資金成本問題,而是要作出風險控制。

大行亦一致預期今次加按息只是開始。

德銀預要加按息多零點七五厘,高盛更加估計、單係匯豐,按息起碼要加到5厘,即係比現水平再加2點15厘,至可以令按揭業務股本回報達標。

結果係,德銀話未來24個月,樓價會跌一成半至兩成。

1 則留言:

匿名 說...

P+3???? 你冇野呀?
係P PLAN 再加3%, 唔係P+3喎!