2013年3月7日星期四

中國危機?


厲以寧、林毅夫,內地兩個大名鼎鼎學者,論國際排頭一定係後者稍高。

今日呢位前世銀副行長一番東南亞模式論,論盡內地未來廿年,百分之八增長無問題。聽落,當然係為中國打打氣,但明眼人都知,東南亞模式,靠勞動密集,低成本,高投資,好日子不再,適逢美國再工業化概,林毅夫還可信嗎?

如果今後廿年,中國增長保持百分之八,繼續由信貸加投資推動,中環人話,你信林毅夫就應該沽中資股。

相反,北大教授厲以寧就提出新一屆政府最大挑戰。

當然,中央只要有決心,厲以寧相信7點5或3點5都不是問題。

但最重要是結構:既要加快城鎮化,優化產業結構,又要避免政府主導投資,帶嚟信貸濫發,同償還債務等問題,所以老問題是:錢從何來?

佢肯定嘅係,如果繼續行舊路,靠投資推動增長,會再度引發地方債問題,最終波及金融體系穩定,呢個亦係目前、內地經濟最大嘅風險。

兩會期間,口水花四起,官員對外,一定報喜多於報憂,但有留意,幾名前及現任部委,分組閉門會議幾段講話,或者係內地真實一面。

譬如工行行長楊凱生,日前閉門分組會議透露,據佢了解零九年,個別銀行一年內批出既信貸,已經超越近六十年累積既餘額。

又好似前工信部長李毅中,另一場分組會議間接解釋,零八,零九年信貸抽升,背後原因就係財政部無錢。

當時身為財政部長謝旭人,直接向李毅中表明,根本無錢可作救市:「毅中,你別再出主意了,我兜里沒錢了。」(李毅中講話值得細讀, 道出08年四萬億救市前因後果!」

所以,高西慶大罵日本印鈔,拖累別國、劉明康痛批美國量寬不負責任既同時,中國似乎對自己亦製造過信貸氾濫,悔意欠奉。

高增長概念背後,結構嚴重,老外對中國評分,似乎係你增長越高,態度越懷疑。

壞帳一定會浮,問題係點浮,同幾時願意浮。如果內地銀行將拖欠貸款日數,由一百八十日,改為三百六十日先視為違約,又如果,新債抵舊債遊戲繼續,內地銀行體系壞帳,可能永世不浮。

內銀唔信,且信香港銀行。全年業績已經公布既本港銀行,對內地壞帳撥備幾乎全線上升,仲要係急升。恒生升一倍,東亞下半年比上半年對中國撥備多八成六,匯豐多左。而永亨對中國業務壞帳撥備,更係大幅上升十一倍。

中環人話,永亨規模較細,壞帳披露反而較清晰,再者佢地貿易融資做最多,永亨就等如中國信貸市場質素一面小鏡子。

佢地內地貸款組合之中,拖欠三個月或以上未償還急升近三倍,二億八千幾萬,就等於內地LOAN BOOK超過百分之一,未算嚴重,但要正視。

有留意銀監上星期數字,內地銀行不良貸款餘額,其實已經連升五個季度。兩會前後,政策憧憬多,但信托理財產品違約個案更多,只係有心人低調處理,豈止得一間華廈?

所以林毅夫,厲以寧,還信後者吧!!

沒有留言: