廉航

勢估不到，東航去年話要在本港搞廉航，事隔半年仍然是大頭佛。

信德，東航，以及Jetstar各佔三分一，搞出一間叫Jetstar hk，捷星香港既廉價航空。

公司剛成立之日，牌未有，政府就「贈慶」，話，暫不處理新申請。

到底澳航透過捷星落戶香江算盤打響如否，似乎變數極多。

捷星，或者澳航，加東航同信德，關係複雜過複雜。

首先，澳航係圜宇一家成員，算係同國泰份屬同門。而信德，旗下持有香港快運五成半股權，另有四成半由海南航空持有，海南航空最近亦被澳航獲薦加入圜宇一家。

俾兩個Oneworld成員夾在中間，國泰一定極大反應。

又係信德，信德除左香港快遞之外，亦持有一成四澳門航空。澳門航空大股東係國航，國航又係國泰第二大股東。

簡單講，呢個關係網，既複雜亦難拆解，廉航呢個牌，到底最終政府係咪好似免費電視牌咁，拖得就拖？

純粹背景，澳航近年之所以唔使執笠，全靠捷星。捷星區內廉航地位，可以匹敵Tiger Airline。但基於基本法要求，要香港攞牌，資金背景佢地過唔到骨，所以既東航，又信德，打足兩面牌。

信德大搞飛機，從最正路諗，係同船務有協調效應。再諗多的話，賭王係咪諗緊一個泛亞太區賭場聯繫概念？係就好睇過戲!!

捷星香港機隊暫定十八，全部係A320，頂盡handle到五個鐘機程，三，四線內地城市，同區內二線城市往返香港服務，捷星絕對有得做。

但想還想，大前題係三關先過，包括政府，國泰，同機場。

國泰地位是否今非昔比，中環人話，Remain Unknown。

以往航權問題，國泰明顯被政府「關照」，但依家發牌與否，中間夾個國航，政府取態，答案係睇阿爺!!

至於機場，問題更大。一，廉航要「平」，但香港機場落陸同處理費，一定唔「平」。

二，二零二零年第三條跑道未有之前，偉大既香港國際機場使用量已經近九成，接近飽和，據稱連航空公司用第五航權申請加班，都有困難。

所以捷星香港雖然比當日甘泉更強，更大，但往後發展，係咪一如賭王所想，好戲在後頭!