樓市最後一根稻草?
代理界, 叫苦連天, 問親後市睇法, 都會話: 一成啦、樓價要跌一成!
大家可能仲係半信半疑，但係今個星期樓價指數，終於有比較似樣嘅郁動!
一跌, 就係半成!
都咪話樓價唔會跌! 龍頭港島區分區指數帶頭明顯下跌, 最新報124.54, 按周急跌5.46%。
港島區連同大型屋苑、以及整體指數跌幅，都創出近四年半最大。
整體指數最新報119.69，按周下降1.79%，創出０８年１１月以來，最大跌幅。
代理指，數據反映六月底，美國聯儲局表態退市，拖累本地業主減價賣樓，預期跌勢未完。
自從雙倍印花稅實施以來，樓價指數累積下調超過3%。
總結一下, 樓價現水平, 相等於比三月中嘅歷史高位。
換言之, 只不過 "應酬式" 咁, 調整咗3.21%。
相比年頭 仍然有3.37%進帳, 作為政府實在無乜理由支持減辣!
因為一鬆手, 反效果有可能係樓價再標升過, 咁政府仲尷尬!
唯一、錄到實際跌幅嘅係豪宅, 雖然最近終止連跌三個月嘅弱勢, 但係代理話唔好信! 豪宅好快會調頭再跌過!
35 個主要豪宅, 上個月平均樓價回升0.8%, 結束連續下跌三個月嘅模式。
不過相比二月分嘅高位, 依然回落咗 2.2%, 表現差過同期中小型住宅市場。
雖然價位止跌回穩, 但係業界認為並非反彈回升, 因為成交量始終太少。
六月分咁, 35個豪宅盤加埋, 只係成到 74宗交易, 相比年頭, 仍然大減 53%。
如果相比舊年十月政府出手壓市之前, 甚至大幅度少咗 58%。
代理話, 自從政府推出3D稅制, 嚴重阻礙投資者同換樓活動, 加上加息預期回升, 相信資金會放緩流入樓市, 尤其係買入豪宅成本太大, 樓價好大機會, 會再次掉頭向下。
還要留意，呢頭美國預示加息，嗰頭本港銀行為保生意, 爆發拆息按揭戰, 但係話咁快又完!
傳出金管局叫停班銀行, 唔好再調低拆息按揭計劃息率, 有早前減了按息的銀行被勸喻下, 調升定價, 普遍銀行最低息率回升至H+1.8%。
近期嘅拆息戰, 近乎惡性競爭, 有中小型銀行指出, 佢地拆借成本相對高啲, 如果以Hibor加1厘65呢類方案去計, 利潤只係得0.27厘, 仲要扣除現金回贈, 銀行近乎白做!
留言