2013年7月15日星期一

情緒化預期??


正當世界以為第二季增長降至七點二、七點三,甚至低於七。

官方數字卻是計岩都無咁準既七點五。數字上舒緩憂慮,但所謂舒緩,仍未解脫疑問,例如如果出口數字早多兩個月打假,其實未必有七點五。

經濟師認為,中央既要奉行透明度,倒不如提供埋扣除水份,即經水份調整後既內地數字。

說回第二季增長,好處係任君解讀,按年確實放緩,加埋季節性調整及年率化,法巴指增長由七降至六點六,但單睇按季,就由一點五,加快到一點七。

第二季如此困難,經濟仍有七點五,即中央目標七點五,問題在於,中央目標是公開,但中央底線,即係政策啟動機制既觸及水平,卻疑團未解。

引用樓繼偉字裡行間,大概可以當係六點五至七,中間涉及既半個百分點,就要睇博奕。

國家統計局強調,內地目前處於結構調整的陣痛期,但仍然在合理區間。又暗中指責媒體,應拋開情緒化預期!

坦白講,呢個情緒化預期,都是官方自己一人有意無意之間做成。

好似上周五財長樓繼偉前後12小時,將今年GDP目標由7%修訂番做7.5%,仲要由官方新華社代佢澄清,試問市場又點會不作猜想!

好似FT所講,財長的確不是制定GDP數據人士,但無論用Jet Lag理由好,抑或真是貴人事忙,但財政政策所有背後假設,都是由GDP而來,豈可忘記??!!

話說回來,今次大數字過骨,但增長質素在在成疑。原本值得引以為傲既消費佔比,由四點三,降至三點四個百分點,投資增長雖則放慢,但對經濟佔分增加近兩個百分點。

所以,沒有投資形成,經濟七點五與否相當明顯,大概內地上半年既是改革前題泛濫,但投資保增長舊路更加泛濫。

增長係咪可以用錢買?答案百分百。

上半年內地新增貸款五萬億左右,按年多二千二百多億,但半年增長由過八,回落到七點六,換句說話,中央其實用更多錢保經濟,但呢個靠資本形成既增長,功效每下愈況。

消費市場大,人均收入高,好日子往矣。正當我地無無知知仲大叫大嚷政策出台之際,內地媒體心水更清,就係矛頭直接城鎮居民人均收入增長,觀乎數字,由舊年同期百分之九點七升幅,降至六點五。

呢個難道唔係最大力證據,支持看淡內地經濟理由?

更想不通係,消費一面改善,但收入增幅一面下降,其實番番到馬克斯主義基本批判前題。

如果七既底線不變,相當於下半年經濟要回落至百分之六點五,才會觸及啟動政策機會,形成日煲夜煲既政策,門檻反而提高好。

摩根最新預第二季增長只有七點二,法興話全年預測必降。似乎,次季數字係中國樂觀預期調控既真正開啟。

幾十年前,老毛年代用過兩條腿走路既經濟模式。中國現在要既兩條腿,反過來可能係控制預期,以及踏實發展。

沒有留言: