怒龍

網龍七七七，對唔少投資者嚟講，今日改名為怒龍，係令人憤怒的網龍。

全日交投高企，股價插水，簡而言之就係洗倉，單日市值蒸發最少廿億以上。

尋日中環人大叫要買網龍，股價大舉爆升逾百分之七，今日情景，唔反面就假!!

網龍創出最大奇景係，宣布出售流動網絡業務91無線，作價超過一百億，大過股價未跌前既市值，理論上係刺激股價向上，而非刺激股價向下。

更有趣係，尋日通街叫買，尋日股價大升，今日一覺醒來，未開市先發出售業務通告，開市即跌一成半，毫無禮貌之餘，最大疑問係，點解咩都嚟得咁岩？

蒙牛買幼粉，假假地停牌幾日，網龍如此重大出售，一，無停牌。二，開市期間整個分析員會議，話八十幾億淨收益會分派股東，後者可以視為股價敏感消息，理應停牌。

完全是選擇披露的代表作，處理上，又被一彈，股東應應向港交所投訴此公司大細超!!

其實，如果睇今次所謂同百度諒解備忘錄，整個流動業務估值近百五億港元，創記錄之餘，以今年盈利預測三千萬美元計，相當於六十三倍市盈率。估值上，絕對極大機會比構思中創業板上市來得吸引。

講開呢件業務估值，四成三係由網龍以外投資者持有，舊年八月，網龍高管透露值一億一千幾萬美金，再同91無線早前引入最後一批投資者作價計，估值大概係三億五美金左右，依家突然爆出值十多億美金，市場反應在在係打個突!!

對百度來講，佢地桌上電腦搜尋器市場佔有率內地佔八成二，但流動業務佔有率值僅百分之九。俾十幾億，網龍係咪幫到佢地，呢個係後話。

確實，呢類手機發展新業務正是內地兵家必爭之地，好似阿里巴巴都要入股新浪微博，加上百度本身只佔手機市場佔有率不足一成, 同佢地網上搜尋市場佔有率82%比較, 交易唔係無道理。

仲要留意係91無綫其他四成幾股權股東, 包括有電盈主席李澤楷及CVC梁伯韜, 仲有新加坡淡馬錫, 有咁多星級股東支持, 今次網龍都要咁急出售股權, 先至令人費解。

所以分析員質疑係，佢地到底係照顧大戶投資者，抑或整體投資者，值得三思。

可換股債券，引入李澤楷，話分拆，股價倍升，依家出售業務，股價爆跌，令人聯想一切盡在掌握中呢幾個字。

好明顯，91無線另外四成三持股股東，一早想套現。網龍點配合，值得疑問。

單睇通告，賣唔賣，原來只需要經佢地首肯，而非777網龍股東。

科網股從來係想憧憬，大拿拿收過百億，但業務增長潛力從此奉上，派息係咪彌補當日因分拆而來、追捧概念既投資者?? 又是疑問。

再者，成舊資產估值比公司市值大，無需佢地通過，更於理不合。

既然再多一隻網股令你無幸福，更加造就屢創新高的馬化騰、先係唯一幸福締造者。