聲譽


華潤實名舉報事件,繼續發酵,而且有更多國家機構開始插手。

繼中紀委介入調查,華潤集團董事長宋林被實名舉報,國資委亦證實有關部門正在對華潤集團進行審計。

一旦存在違法違紀問題,將依法嚴肅處理。

值得注意兩點: 首先,華潤集團03年起,由外經貿部直屬機構「過檔」到國資委,成為最大央企之一。

今次由「阿媽」國資委出聲,話留意到實名舉報,仲話要進行審計,顯得事件極不尋常!

更重要是,先由中紀委宗在一日內就證實收到舉報,與上次國家能源局局長劉鐵男被舉報後,要等成兩個月先有表態,已經有好大分別。

加上今次連國資委,都緊接主動表態,熟悉內地人士就話,幾乎都斷定,華潤集團內部肯定有問題,否則用辭唔會咁強硬!

華潤情況,中環人形容,由水洗都唔清,到唔知幾時要水洗得清。

主角華潤電力,三日以來合共跌幅超過一成半,市值蒸發最少百五億,金額已經超過三年前、被指問題交易嘅山西煤礦。

藍籌連跌3日,引證中環人唔知幾時水洗得清憂慮。如果講事件進展,主角宋林首度回應,具體欠奉,但人在香港。

有分析員疑問,集團董事長難道唔係喺集團總部北京辦公咩?

曝光三日,三日未曾顯著反彈。外界矛頭直指: 點解華潤電力唔駛停牌?

逢係有敏感消息,都要停牌。但過往好多情況係,復牌之後,股價比急跌更加急跌,屆時又有一批人鬧、點解停牌。

再者,宋林呢個CASE,屬於集團總公司最高管身份,技術上,未必觸及必需停牌。而監管機構立場,當然可以叫佢停,即係勒令,但到時,就大件事了。

華潤電力被不斷指控,三次回應,但被指空洞。分析界批評,華潤電力牙膏式回應,的確不知所謂。

論影響,野村一句直接,聲譽受損,溢價削弱。堂堂一間藍籌公司,比小股東,同記者發圍,發難,都算醜怪!!

華潤電力舊年全年盈利78億港元,野村計算,項目假設最壞情況,並再假設華潤電力已經同時向中信信託增持項目,頂多撇帳額僅僅67億,即係,最衰最衰,都繼續有錢賺。

可惜,連日來,市值蒸發金額比潛在影響更大,只能嘆句可惜可惜!

留言

此網誌的熱門文章

「急於求成」 JPEX 爆煲引證證監會監管不力

減辣不單徒勞無功 甚至「好心做壞事」

三十而立的金管局:思良將