2013年8月16日星期五

烏龍指


二零一三年八月十六日上午十一時零六分。

中國出現一隻肥手指,扭曲市況,創造經典,製造奇跡,更重要一定成為現代股市其中一個肥手指重要案例!!!

肥手指,FAT FINGER,內地稱之為烏龍指。「肥肥大大烏龍指,爆升場面在眼前」:上證指數數分數內升半成、重磅股集體被「秒殺」,包括工、建、農三行等等升停、為數七十一隻股份漲停,內地ETF交投較平日高於九倍。

事件重溫,十一時過後,全城嘩然,夢的夢,叫的叫,問的問!!被形容是「詭異暴漲」, 一息間謠言四起。

綜合當時三大版本:一,光大錯盤七十億人記、二,花旗落下五十億人仔大單、三,午後公佈優先股試點方案,流通股大減云云。

當然,版本盛傳不下十個,光大肥手指鬧得最熱,但有趣係,光大最初企硬,到下晝照單全收,通通直認,既指系統有誤,配合調查等等,到底呢幾個鐘,發生咩事?又係咪系統出錯咁簡單??

首先,盛傳系統問題製造肥肥大手指,涉及交易量僅僅五至七十億人記,如果記得九八年白頭打大鱷,千億先可以勝仗,七十對一千億,睇落殊不合理。

但內地交易員指,以國產藍籌成交不足,兼且涉及ETF及其他指數相關放大效應,原來廿億足以令其市況舞高弄低,一切盡在掌握中!!!

金額上,錯盤造就一分升爆升市,尚且合理,但系統上,有資深賓卡問,如果盛傳中三千單位,變三千萬錯誤輸入,換句說話,涉及四個位差異。

問題自然帶出:一,操作上,其實好難錯誤輸入多四個位,情況等於櫃員機轉帳三千,無可能變成三千萬!!

二,落後如越南、印度交易系統,只要輸入單位超出可授權,或遠遠偏離過往平均輸入水平,系統會Default,或者需要上司,上司既上司一併確認。

三、任何交易系統如果出事,基本上會響機,如果系統出事,觸發響機,光大亦無可能當初否認其事!!!

更奇係,因系統錯誤導致既肥手指錯誤,十居奇九可以爭取作廢,惟光大既光明正大,亦慷自己之慨,可以同意全數完成交易,在在惹人懷疑。

當然錯盤交易就算強如美利堅的華爾街,一樣有過2010年 千點指數「快閃崩盤」及去年臉書納斯達克襟爆盤事件,但人家有的是制度,出現問題後瞬間已查明原因,快速堵塞漏洞。

內地媒體指,上證不批准交易作廢,其實是有所進步,除非證明交易系統有誤,否則最少要迫光大要面對投資者「自吞苦果」,至於如何賠償則是後話!!

六月拆息風暴前,光大屬主角銀行之一,肥肥大手指,又被千夫所指。更巧合係,外圍越亂,內地股市愈不跌,招行越傳落實供股細節,內銀業績期將至,股價就是大升。

中國股市引人入勝之處,盡在不言中。前海乘金融中心之名,打造地王同日,我國肥指、地王其實互相攤銷!!

當然,事件亦令人反思,內地股市到底是深度不足? 抑或制度過於兒戲? 畢竟一筆70億既交易,就可以搞到個市大上大落!

睇返啲成交,一啲佔股市比重大嘅股分,成交額都唔算話好驚人,好似啲內銀股,都係一億人民幣左右。

有內地基金經理計過,要操縱內地股市、只係要20億左右,買5、6個香港超級豪宅,都係呢個價,所以背後問題更值得深思!

沒有留言: