跳水
交易員嚴陣以待，星期二公開市場操作，未有令市場失望。
人行兩星期以來、首次重啟逆回購，內地長息顯著回落，不過短息就仍然高企。
人行估計、第四季流動性會保持平穩，瑞信經濟師陶冬相信，人行注資是有象徵意義、反映當局不願再見到拆息風暴。
內地股民又集體上演一場跳水SHOW、而且跳水姿勢驚人，先係來個5.7周轉跳水，但跟著可以翻身跳升3.9周轉，你話係咪神乎其技!!
唔好講得咁神怪、雖然創業板表現真係相當離奇，一度大跌近6%，在眾人死心之際、尾市來個急反彈，收市只是跌1.8%。
但中間波幅、已經叫老股民承受不起。
當然網民會找甚麼六大理由、三大因素，好似係三全中會是利空居多，仲有賴國務院研究中心分「383」研究報告，發音正是「散吧散」，股市唔散都難!
內地股民似乎因為絕望心情、已經近乎迷信，我地拆局其實認為睇數據先最可信，跟據最新基金季報顯示，當創業板第三季暴漲三成半時候、基金經理已經「移情別戀」，持倉量不升反跌、減少122億，持倉量降至1000億左右。
所以話、聰明錢幾時都係聰明過人!!
雖然經歷過今日跌落股市地獄、不過股民似乎未咁快死心，特別對於尾市大反彈，反而認為是利好訊號。
有大行亦都認同、瑞銀策略師陳李相信今輪下跌，只是之前漲幅過大，不過佢都承認，創業板今次應該係已經潮退、特別是面對業績無市場預期咁好，以及三中全會之前、是有過高期望。
炒錯邊現象、唔單止出現內地創業板，香港呢邊、近日一批強勢科網股都出事，網龍金山軟件同Tom，好似連環洗倉，幾乎全部洗白白。
再數遠些、有小米以為誤中先思行，之後創興「低價」成交連累一眾中小型銀行股，一樣係炒錯邊典範!!
但最經典要數隻「432」、昨日炒高三成幾後停賽，中環賓卡奔走相告以為小小超今次玩認真，會將富衛注入盈大地產、結果人家琴晚就出通告，話比大家知，又是一個美麗誤會!
係咪「美麗」真係唔知、但大曚就肯定有分，盈大市值計埋得個十億，以月初富衛引入瑞士再保險12%股權，作價已經要33億、即是整間公司估值達270億元!!
小小超財技雖然已達神級、但要用十億蛇吞象富衛，恐怕再多幾個袁天凡梁伯韜，都變不出咁離奇交易!!
留言