2013年10月30日星期三

諗多左?


在周二收市後,新華社公布左一個日子、即時被自認市場觸覺敏感人士,認為是大市轉勢一個轉捩點!!

國家主席習近平召開政治局會議、定出十八屆三中全會,召開日期是119日至12日,其實市場早就預左、要到11月先開會,點解日子咁重要?

咁就要重溫下財經通識、三中全會平均大約每五年一次,78年改革開放以來,只有兩次是在十一月打後先召開、而咁巧合,呢兩次均是被認定為中國近代史上最重要的兩個三中全會,剛好時間就是在12月及11月舉行。

呢兩次三中全會、正是1978年第十一屆,以及93年第十四屆。

78年那次、就是由鄧小平推翻「華國鋒」的「兩個凡是」理論,確立改革開放路線。據聞由於改革規模太大、加上要為文革平反,之前的預備會議,就足足開了36日。

至於93年那次、就由江澤民提出建立社會主義市場經濟,之後廿年中國堀起、都是得益那次會議。

莫非今次十八屆三中全會、一樣有咁重要的改革決定出台?

當然唔敢咁講,有內地分析家將矛頭指向政治爭鬥、似要薄熙來終審後有判決先公布開會日期。不過我地對呢個講法有保留、似乎是太少看新領導層氣量。

其實今次三中全會、都可以說是一波三折,三月時被寄予重望,點知到六月一場拆息風暴,外界迅速將期望降至冰點。

現在最新放風,又突然話成果「遠超預期」喎!!

法巴陳興楝、以及瑞信陳昌華均對會議寄予厚望,原因正是兩日前、我地都有報道過的383國務院研究中心報告。

陳興楝總結: 既勇敢、甚至是史無前例
陳昌華就話: 係「Nice」有驚喜,對內銀同內險股、可能有意外收獲。

簡單回顧下383、改革包括推進土改,開放關鍵行業比民企及外資進入、推進匯改以及容許地方政府發債。總之關鍵就是要減低政府職能、國退民進。

大行咁捧場、唔可以唔提383靈魂人物: 國務院研究中心主任李偉和發改委副主任劉鶴。

特別是劉鶴、目前兼任中央財經領導小組辦公室主任,已經從事財政工作20年,連外國媒體都形容,劉鶴是一位才華橫溢的經濟技術官員。

不過亦有大行潑冷水、麥格理話大家唔好「諗多左」,原因係劉鶴李偉雖然有大名登左喺報告,但呢個只係內地機構慣常做法。

而且內地所謂國家智囊何其多、根本無需過分解讀。

坦白講、習李政府只係新上任,未來工作期限長達十年、呢一刻就算提出更進取的改革方案,都不急於一時三完成。


講到同78年以及93年兩屆、更加係不能相比,因為當時是意識型態之爭、如今相對是技術性改革為主調,大家炒板塊都係小心些。

沒有留言: