2013年11月12日星期二

開倉派米

或者阿里巴巴話題真係太熱、市場對LME處理提倉過慢既問題,一直唔太熱心。

而小加總裁亦只肯簡單回應、話已完成諮詢,業界積極反應,未來會進行全面改革云云。

積極反應?
恐怕係積極反對嘛!

LME倉庫最大既七個城市、包括美國底特律、新奧爾良、荷蘭弗利辛恩同鹿特丹、比利時安特衛普、新加坡同馬來西亞柔佛,星期一已經聯名反對LME最新的修訂,形容新規例只會增加金屬價格波動。

簡單回顧下、上星期LME新例,要求倉庫如果在使用者排隊取存貨既時間、一旦超過50日倉庫就要按比例, 強制性釋放更多庫存。

簡單講就等同「開倉派米」,而之前原來建議、係要100日時間,可能而知呢幾個經營庫存地方政府,肯定大力反對。

而金屬生產商包括俄鋁同美國鋁業、都反對修訂,認為係行政干預市場。

但最搞笑係部分使用倉庫既機構、例如鋁罐生產商MillerCoors,都認為措施作用唔大, 要做, 就要徹底取消倉庫排隊情況。

所以路透評論「一語中的」、LME新措施根本係兩面不討好, 李小加講過要用「火箭炮」先解決到LME問題, 路透評論認為, 火力仲係唔足夠, 可能要動用一整隊軍隊, 先能夠解決目前問題

公平啲講、現在排隊時間已經長到不能想像, 以高盛為主, 操控既底特律市場, 目前提倉時間長達19個月, 幾乎係年半時間。

嘉能可控制既荷蘭弗利辛恩、取倉時間亦長達18個月, 對生產啤酒汽車既廠商, 根本唔能夠接受, 只能以更高溢價在市場購入原材料, 結果又推高金屬價格

做Warehouse 居然會成為投行既大生意, 恐怕上個世紀都無人估到, 完全都係靠商品市場熱炒, 透過不斷拉長排隊取貨時間, 高盛等倉庫經營者可以賺取高額存倉費。

到底新措施係咪收效?

法興分析員好質疑, LME的新例, 其實只會促成庫存由LME轉移至場外、不受監管的其他倉庫
聯儲局已經積極檢討緊、到底係咪仲容許銀行, 可以獲豁免繼續經營倉庫業務, 以國會而家來勢洶洶, 當局好可能會出手, 令高盛、摩通呢啲大戶, 被禁止再經營倉庫。

一旦佢地退出、勢對LME會造成打擊, 如果有留意388上星期業績, LME單計第三季盈利只有5100萬元, 較上半年的2.6億顯著放緩。

所以路透都質疑、LME到底有幾大決心解決問題, 有留意76頁既文件細節, 會發現LME 隱藏左尾巴, 就係要求金屬使用者應該同倉庫達成協議, 將排隊時間同一個獎勵既Incentive掛勾。

LME好強調呢個Incentive, 並非係推高金屬價格既溢價, 但具體結果大家都好容易估到。

所以話、魔鬼都係藏在細節, 而金錢掛帥亦係永恆既真理!!

沒有留言: