股王

七間大行出手、將股王地位進一步提高。

單日升幅18個2、以金額計，破晒紀錄。

美林大摩之外、連富瑞、渣打、匯證同德意志，都好慷慨上調700 既目標。

個別都迫近500元、同最樂觀摩通睇既506元，都好接近。

似乎大行都收晒貨、你會問，又話業績低過預期，咁點解釋今日升幅?

一個解釋係為左抗衡阿里巴巴同新浪、推廣開支大幅增加79%，用以推廣微信，呢點大家其實都無咩反對。

另一個理由係當大家焦點放晒喺新業務發展時、其實騰訊既「網遊」收入，並無預期咁差，反而密密引入更多熱門遊戲，第三季網遊收入更升41%、係今年以來最高，令分析員都跌晒眼鏡!

最多人識講係昔日皇牌「DNF」地下城與勇士，由於之前原創既南韓公司Nexon、已經預告來自內地收入放緩，分析員識計數都降低左盈利預測。

但估唔到係後來者包括LOL 即係「英雄聯盟」、以及「御龍在天」擴充版，更令用戶達到80萬用戶，完全彌補到DNF跌幅。

做700分析員都幾好、有陣時自己都可以名正言順玩下呢類網遊，睇下係咪受歡迎嘛!!

有大行就睇好未來兩隻新貴、「刀魂」同「戰斗神」。似乎唔可以睇少、總裁劉熾平就話已經進入最後公開測試，言下之意都寄予厚望。

其實在分析員會議上、騰訊都表明未來幾季，流動業務根本唔急於商業化。未來幾季網遊仍然係主力收入，佔收入比例仍然過半。

摩通更相信、發展「手遊」，唔會取代「網遊」，原因係用戶只會花時間在戶外玩「手遊」，返到屋企仍以「網遊」為主。換言之、只有增值效用。

「手遊」推出時間只有三個月、已經有5.7億用戶，「天天酷跑」更長期霸著蘋果IOS榜排行榜首三位，肯定係未來寄望，不過而家騰訊唔積極推廣、其實亦有自己苦衷。

有北京既調查機構就一語道破，話以現時內地3G網絡既速度，要發展高速「手遊」甚至推廣微信其他APPS、用戶根本唔會有興趣。

要全面推資、馬化騰而家等既，其實係4G出台，到時先係合適時機推廣手機應用、估計仲要等多一、兩年時間。

所以話，今天40幾倍市盈率，過千億美元市值，係咪真係好可怕?

過多一年半截、可能馬化騰會有另一個答案!!