新股詛咒

年尾咁多新股，有幾多屬於真心真意為業務? 

有幾多純綷等錢使，喺內地籌唔到錢，嚟香港埋單?  劃公仔、毋須劃出腸。

實話實說，信達、光大銀行均屬於埋單概念股。提起光大銀行，有如股市詛咒，命中程度，不下於秋官效應。

光大銀行白書仔，已經上載港交所，意味港股、面對詛咒、再行近一步。

從好方面諗，上市喇，以往醞釀上市詛咒效應俱往矣。香港市場太特別，今日批評光大銀行詛咒之星，日後正式招股，隨時又大炒概念，況且，香港人對中資金融股，係情有獨鐘。

好了，光銀及信達二選一，如何決定? 就呢個問題，我們做一個小調查，五名經紀，全數認為信達好。

其中一個因素是此消彼長比較效應：截至九月底，光大銀行盈利按年僅升一成四，未算跑贏同業，撥備少了，但更有趣在於撥備幅蓋率由去年底近三倍四，降至九月底僅有百分之二百五十四。

光銀用預留撥備，上市前注銷壞帳實太明顯了。

相對光大銀行，信達、屬於神秘，難以量度，某程度上，其實構成利好。

況且，金改熱炒，作為一間跨行業經營嘅金融機構，各項業務牌照，幾乎應有盡有，信達嘅獨特性，不能忽視。

信達有別於內銀，在於前世與今生。前世方面，沒有信達，建行當年上市必定受阻，更重要信達估值逾一倍，令到內銀股更相對便宜。

信達既然有恩於內銀，但似乎內銀、有忘恩負義之嫌。

無信達，內銀點可能成功上市，奈何無一間內銀、成為信達基礎投資者，或多或少令人失望。

前車可鑑，有前例參考會構成負擔，信達賣點現在是任君演譯，俗一點，有幾大可以吹幾大。

逾一倍股面值，承銷團擺明製造「恩公溢價」。或者，從內銀有所獲利朋友，倒可考慮信達一手，以報當日爛帳接收之恩。