2014年1月10日星期五

偏緊


距離農曆年仲有三個星期, 已經有人開始憂慮, 傳統季節性資金需求增加, 係咪會再引發新一輪錢荒?

暫時從表面情況睇, 上海同業隔夜拆息連跌十三日, 七日期拆息、比上個月高位, 回番超過一半。

但中環人都好清楚、人行根本唔會為左, 舒緩市場對資金緊張的憂慮, 而去提供流動性。

人行只係會繼續喺唔引起恐慌的情況下, 引導市場利率逐步走高, 所以要不斷咁重複提醒銀行, 唔好再寄望, 過往由市場借入平錢的時代, 會再出現

當然人行並唔會開到口, 話希望保持貨幣市場緊張, 只係會低調提示。

就好似喺上星期大除夕、資金緊張先至剛剛緩和無耐、當交易員想過返個平平安安大除夕之際,突然打聽到人行向銀行提出,要進行一次債券回購操作、要求銀行短暫回購債券,當日呆在當場!!

他們心中理解、雖然規模同時間都唔清楚、但人行發出嘅訊息非常明確, 就係會維持政策從緊, 以及鼓勵加快去槓桿。

當然市場利率高企, 唔能夠話係由人行一手造成, 之前人行第三季報告都提到, 房地產投資以及地方城市建設過度融資, 導致貨幣配置失衡, 推高融資成本。

引導市場利率走高、保持貨幣市場偏緊, 無錯係可以防止中小銀行胡亂放貸、再加大槓桿。

但單係咁, 亦唔代表銀行的壞帳問題, 會慢慢自行解決。

相反一旦利率上升, 引致的結構調整, 進一步削弱產能過剩行業及房地產企業流動資金水平, 銀行壞帳隨時會快速上升

為應對不良貸款可能大增、近幾個月銀行進行資產沖銷、及剝離不良貸款嘅個案層出不窮。

不過要留意、資產沖銷的成本一啲都唔低, 有可能會侵蝕銀行的貸款減值撥備, 甚至係資本金, 加重番銀行補充資本壓力。

宜家已經知道, 今年再有多三四間銀行已安排上市集資, 去補充資本。但問題係、上左市的內銀, 好多已跌穿資產淨值, 嚟緊銀行招股, 仲係咪吸引到投資者認購?!

沒有留言: