2014年1月23日星期四

萬億基金


外匯基金又到公布成績表時間,全年業績都要倒退,按年賺少近三成二。

以投資回報率計、舊年賺2.7%,不單跑輸過去5年平均數,同外匯基金94年推出以來、有5.4%回報比較,回報愈來愈低,陳總裁今次有啲失威!

說話又唔可以咁講,皆因上半年虧損、下半年發力先可以全年追番,而且聯儲局退市,就連債王格羅斯都損手,所以金管局都表明,今年將加強債券投資防禦性部署。

但舊年外匯基金最大動作、反而係在倫敦做發展商起樓,呢啲所謂「多元化投資組合」,舊年回報有成15.9%,跑贏整體回報率好多。

老實講,一年又一年,金管局季季如是,外圍不穩、投資環境不明朗,外匯基金繼續審慎投資、呢條Line to take,改改啦!!

無疑,受惠半年債息掂、半年股市勁,外匯基金投資收益七百多億,又如何?

按回報率,陳德霖比PIMCO 埃里安贏幾條街。外匯基金回報比上不足,比下有時亦不足。但調轉問,香港人真的關心外匯基金賺多少嗎?

老實,輸錢與我何關,頂多由陳德霖、余偉文負責、贏大錢亦不會分給香港人,可以真真正正造福人群。

幾年前,本台有個系列特輯,名為「萬億基金」、多年後今日,外匯基金總資產已經直逼三萬億,而用途、或主要功能卻完全如一,支持香港嘛!!

並非向聯匯柴台!! 聯匯制度下,本港貨幣基礎要百分百美元支持,因而令外匯基金有所謂被動投資,有關部份,投資一定要穩、組合一定美元為主、作用一定要支持港元。

簡單又而明! 目前本港貨幣基礎為一萬二千五百億港元左右,換句說話,外匯基金真真正正,構成支撐港匯功能,其實僅需要同等金額,亦再換句話說,本港目前外匯基金總資產,數字上有近萬六億左右,可以視為實際功能欠奉的剩餘資產!!

錢多有錢多類惱,如果陳老闆去年將餘萬億,一半買騰訊、一半買銀娛,豈不是發過豬頭!!

現實當然不可能,但錢多、回報低,就等於醜死鬼。為免醜怪,於是金記被動投資以外,有所謂主動投資,入面又設有特殊投資,結果得閒買吓物業、得閒做吓私募基金、如果科技繼續熱爆,陳老闆隨時分部份俾凱旋姐維港基金打理!!

外國主權基金,回報至尚關係,硬要將外匯基金拉作比較,未免不大公平。面對過萬億無所事事資金,並不是呼籲進行派錢,但要柴台,問題在於政府及金管局當局從來未有聰明運用。

近日,思丕與約翰為錢傷感情、核心問題在於一個要洗錢派福利,一個要慳錢為將來。兩個其實無錯,而錯或者在於,未夠聰明!!

撇除社會福利,香港仍然計劃大量基建、社會建設,在外國,例如英國,政府一早打保險公司主意,拉籠保險資金投資基建,點解香港唔得?

將基建、或部份社會設施,打包成為有現金回報穩定的投資工具,再由金記用部份過剩基金投資,約翰曾毋須要為政府大洗而煩腦,陳德霖亦無需要繼續俾錢鬼子佬賺。

至少產品安全程度,百分之一百勝過「誠至金開一號」!

沒有留言: