晒冷


奇景盡現,屈指一算,是日多達五間大行,傾巢而出,合奏一曲「澳門股升勢進行曲」!

同一曲目,指揮各異,但用中金報告標題,澳門博彩股事到如今,係就買,唔買就永世收聲!!

澳門,或任何一個賭場,任何一款賭法,結局非贏則輸,但大行對呢個非贏則輸行業,全部清一色買贏。

正因如此,當地賭神電影一樣盡在眼前,以銀娛目標為例,你買八十、我九十大你、見你出九十,我去夠一百「晒冷」。

里昂、花旗、大摩、美林、中金,論對行業前景樂觀,花旗最盡,估今年博彩收益增長兩成、用頁數比較,花旗錦上添花,憑二百三十八頁報,大、中、小博彩股再搭拉斯維加斯及區內,勁!!!

而目標價計,出位代表莫過於中金,周姓分析員一不做、二不休,銀河目標俾夠一百蚊零八蚊。

越係升多,越要高CALL,成為大行過去六至九個月策略,中金早有前科,騰訊三百多塊時,已經首間預期見五百,結果贏盡全場!!

銀河若再下一城,難道LEVIN 可以為寶號易名為黃大仙證券??

無人否認博彩行業增長未完,但有關目標價水平,或多或少已經加入非客觀因素:包括心儀邊隻?以及要夠出位。

博彩收益預測,花旗預期增長二十,VIP更達三十五,銀娛目標是九十一,但剛才提及中金100.8,該大行對整體博彩收益其實僅僅一成三。

股價長升長有,分析員創造力備受考驗,例如要用新模型去令價位合理化、又例如製造派息、收購等等買點。真係分析員都唔易撈!!

間間大行目前相信,澳門可以增長再增長,因為新項目帶動人流,但花旗反而認為,今年為九年來首次新項目欠奉一年,既然人流多,項目供應維持不變,即代表增長加快?即係點呀??

行業會有盛衰,分析員抽中睇澳門股,等同中六合彩,相反當日紅極一時銀行股分析員,近年多間大行已經將內銀、港銀團隊二合為一,情況等如地產及綜合企業股一樣。

澳門或科網升勢未停,因為有GROWTH!!! 試問那個行業維持增長?

但同一時間,今年經濟師、評論員,以至伯南克對經濟轉為樂觀,部份相信美國增長有四大個百分點,區內最少有七,既然增長加快,企業盈利理應反彈持續,係咪?

「澳門股升勢進行曲」,或多或少體現市場其實矛盾異常!!!

留言

此網誌的熱門文章

「急於求成」 JPEX 爆煲引證證監會監管不力

減辣不單徒勞無功 甚至「好心做壞事」

三十而立的金管局:思良將