通了誰?
０７年８月某日下晝情景，再活現眼前，同樣一紙通告，同樣股市由爭持、變喪追，同樣給予市場嘩然的興奮。
所唔同嘅係，七年過後，佈局來得精心策劃!
先由內媒放料，形容、運作、規模兼備，再有總理一句，確認計劃權威性，接住港交所停牌，不足三小時內，中港證監會公佈，互聯互通啟動了!!
直通車好，合作互通好，由於涉及資本帳開放，誰是主人實在太明顯，２千５百億人仔，相當於本港五個交易日成交；
每日額度計，亦等同兩成左右平均每日成交，錢多左、對股市影響已經體現。
股市一定要升，理由不難理解，但以內地炒風，即日鮮性格，用人仔買港股，等同比港人最少八折優惠，更重要是，兩地交收機制不同，一個T+1，一個T+0，套戥易？抑或操控容易？有勞中港證監了！
互聯互通之下，內地人買港股要搵經紀，先經兩地交易所，再由本港經紀執行，交易所角色尤如睇門口。
首先，資本帳事關重大，佢地需要mark 數；其次，由於涉及每日額度，兩個交易所角色有待進一步厘清，到底佢地係咪收齊order，先轉介俾對方市場經紀？抑或一爆即停？
系統是交易所今日不斷強調事情，人仔處理量之外，佢地無講既，仲包括兩地交易系統速度分別之大，若任由兩地交易指示直入直出？不得了!!!
交易所既係水閘，亦係守門口，表面上完美之極，但再諗深一層，所謂互通，其實係pure long，即是只有買、不能沽空或做相關套戥，背後又有咩影響？
互聯互通半年後的事，但一紙公佈，形同滬深交易所首階段合併，市場政策，資金流向，總之太多，太多，誰是主人，香港市場獨特性係乜?值得諗諗!!
市場真正功能應該反映價值，發掘潛力、集資平台，滬港市場互通機制下，上述是其中一個目標之一。
香港市場希望更多資金，內地市場希望更多資金之餘，亦冀望香港市場成熟方式可以引入。
如果只著眼資金的話，定價、發揮潛力、集資，就可能僅僅淪為炒賣、扭曲、及套利。
兩地機制仍然不盡不同，是否因為互通而觸發套戥？並達到兩地股份價差收窄，並且一致？
長遠事，長遠才會發生。再者，兩地市場基於投資者結構，衡量因素不同，基本上有如戴兩副不同眼鏡，如果以為三千多億即時改變一切，似乎太跨大呢數千億!!
價差不同，沽貴買平，的確合理，但今次如此情況，個別溢價股跌幅如此大，實在要問，係咪跌過籠呢？
從今日、尋日、及個多星期股份走勢睇，多隻原本唔明點解升既股份，宜家開始明！
澳門博彩股，原本預見頂，爆!! 本地銀行股，併購都七七八八，照爆!!!券商股，近排又郁!!!
太多，太多，難怪中環人只可以聯想三個字，「春江鴨」。我地興奮之日，已經成為部份人套現之時。
中國證監會發言人有兩句說話很值得深思: 投資習慣不變、第二句係不將深交所列入互通，乃基於風險管理因素。
用呢兩句說話再分析，其實在在代表，內地炒風習慣不會一時三刻有變，加入深圳，情況或更瘋狂。點都好，多謝國家之餘，香港市場要嚴守嘅係監管、規舉，並且從而提升自我價值，否則，對香港來說，互聯互通之後，就是被淘汰!!!
留言