G2V

市場近日表現，似乎違反市場慣常的基本假設常態：例如爛股點解會突然有追捧？例如騰訊

未拆細前，竟然股價先行「技術上步入熊市」、又好似萬人矚目的阿里巴巴未上市，科網提早玩完!!

科網或新經濟股跌，外界慣常形容為玩完，爆破。但玩完、爆破、同調整，涉及３個唔同程度構成嘅３個不同結果。

所以，如果簡單問，「近日科技股表現，係咪代表新經濟玩完？」，點答你呢？事關上述一條問題，已經將涉及嘅結論拉到極端。

同樣拉到極端，在於有關同股不同權討論，股權不同權等於大細超，對小股東不公平。但現實是，很多情況下，基於不同環境，經常有同股不同權發生，例如重大關連交易投票，大股東形同有股但無權。

正如李小加話，咩情況下，保障投資者利益，先係市場必要具備核心。

講番科網同新經濟，外界似乎陷入一個陷阱，就係點樣介定調整後嘅科網同新經濟股嘅合理水平。

又以騰訊為例，無論麥樸思、策略師均視五百大元合理，無疑，我地無否定五百不是合理位，但要認同真正合理估值前，先搞清楚兩點：

一，全球整個行業股份都同一時間調整，在估值是否合理命題上，是牽涉相對性，而非絕對性。二，由近六百五，跌至五百，價位上抵，但既然近六百五是外界認定為過份上升結果，五百大元水平，有否經過辯證，證明是合理上升的股價水平，簡單講，你又知之前五百蚊騰訊，唔係升過籠？

由認為季結，到開始相信大戶換碼，科網同新經濟跌因不明，但實話實說，大經濟環境有憧憬，傳統行業未死亡，構成G2V誘因，即係資金由增長股轉移到價值股。

你話八倍PE股值博，抑或四五十倍嘅值博？

納指從高位大約跌半成，但彭博計算的區內科網股指數，三月初高位至今跌約一成半，實在反映，部份區內科網或者可能虛有概念，升幅似乎不理智。

大摩話，今次資金轉移G2V，重傷係對沖基金，事關大部份長短倉基金，係一面LONG增長型，一邊沽傳統型。

正因為咁，跌勢已成之下，咩叫骨牌？依家知啦!